سرینگر مارچ 22(ٹی این ایس)متحدہ جہاد کونسل کے چیئرمین اور حزب المجاہدین کے سربراہ سید صلاح الدین نے حریت رہنماء محمد اشرف صحرائی کو تحریک حریت جموں وکشمیر کا چیئرمین مقرر کئے جانے کو مستحسن اقدام قرار دیاہے۔کشمیرمیڈیاسروس کے مطابق سید صلاح الدین نے سرینگر میں جاری ایک بیان میں کہاکہ اشرف صحرائی کی تقرری سے تحریک آزادی کشمیر پر مثبت اثرات مرتب ہونگے۔انہوں نے کہا کہ محمد اشرف صحرائی نے اپنی پوری زندگی اسلام اور آزادی کے لئے و قف کررکھی ہے اور ان میں قائدانہ صلاحیتیں بدرجہ اتم موجود ہیں۔انہوں نے امید ظاہر کی کہ کل جماعتی حریت کانفرنس کے چیئرمین سید علی گیلانی کی سر پرستی میں محمد اشرف صحرائی تحریک آزادی کشمیر کو منزل سے ہمکنار کرنے میں بھر پور کردار ادا کرنے میں کامیاب ہونگے۔ انہوں نے کہا کہ مسلمہ اور جانثار قیادت ہی موجودہ جدوجہد آزادی کو اسکے منطقی انجام تک جاری رکھنے کی صلاحیت رکھتی ہے اور اللہ کا فضل ہے کہ کشمیری قوم اس معاملے میں بانجھ نہیں۔ متحدہ جہاد کونسل کے چیئرمین نے کہاکہ تاریخ گواہ ہے کہ1947 سے با لعموم اور1989 سے بالخصوص کشمیر ی قوم نے بے مثال قربانیوں پیش کی ہیں اور حریت پسند کشمیری عوام کی قربانیاں ضرور ایک دن رنگ لائیں گی۔
