وزیراعظم محمد شہبازشریف آکھیا جو زرعی شعبے دی ترقی اتے برآمدات ودھاوݨ کیتے اساں جامع منصوبہ ٻݨائے، پاکستان جلدی اپݨے پیراں تے کھڑسی۔ مہانگ ہݨ ڳھٹدی ویسی۔ آئی ایم ایف دا پروگرام اساں خوشی نال قبول نی کیتا، زرعی شعبہ پاکستان دی تقدیر بدل سڳدے۔ زرعی شعبے دی ترقی اتے برآمدات ودھاوݨ کیتے اساں جامع منصوبہ ٻݨائے۔ سفارش اتے کرپشن ملک دا ضیان کیتے۔ ہک وی لیپ ٹاپ سفارش تے کائنا ݙتا ویسی۔ پاکستان آندے کجھ سالیں اچ خطے اچ خوشحالی اتے ترقی یافتہ ملک ہوسی۔ سعودی عرب اوکھے ویلھے پاکستان دا ساتھ ݙتے۔ ݙو ارب ڈالر ݙیوݨ تے سعودی عرب دی حکومت دا شکریہ ادا کریندوں۔ اے ڳالھیں انہاں منگل کوں فاٹا یونیورسٹی دے فیز ون دی افتتاح اتے لیپ ٹاپ تقسیم کرݨ دی تقریب توں خطاب کریندیں ہوئیں آکھی۔ ایں موقع تے گورنر خیبرپخوا حاجی غلام علی، نگران وزیراعلیٰ اعظم خان، وفاقی وزیر اطلاعات و نشریات مریم اورنگزیب،وزیر اعظم دی معاون خصوصی برائے امور نوجوانان شزہ فاطمہ ، وزیراعظم دے معاون خصوصی انجینئر امیر مقام،معاون خصوصی عطا تارڑ اتے چیئرمین ہائرایجوکیشن کمیشن ڈاکٹر مختار احمد وی موجود ہن۔ وزیراعظم آکھیا جو انہاں کیتے خوشی اتے اطمینان دا ݙینھ اے جو پشاور اچ لیپ ٹاپ سکیم شروع تھی ڳی اے۔ اے صوبہ رحمان بابا ، خوشحال خان خٹک دی دھرتی ، دلیر ، بہادر اتے غیرت مندلوکاں دی سرزمین اے۔ ایں صوبے پاکستان کوں دہشت گردی توں بچاوݨ کیتے تاریخی کردار ادا کیتے۔ دہشت گردی دے خلاف جنگ اچ اساں اپݨا لہو، نال بزرگاں، ٻالاں ، تریمتیں اتے ہر شعبے توں تعلق رکھݨ آلے لوکاں قربانیاں ݙتن۔ انہاں قربانیاں دے بغیر دہشت گردی دی لعنت نی ختم تھی سڳدی۔ وزیراعظم آکھیا جو ہک لکھ لیپ ٹاپ ہونہار طلبا اچ پورے ملک اچ میرٹ تے ݙتے ویندےپن۔ لیپ ٹاپ حاصل کرݨ آلے طلباء کوں مبارخ ݙینداں۔ تقریب توں گورنر خیبرپختونخوا، وزیراعظم دی معاون خصوصی برائے امور نوجوانان شزہ فاطمہ اتے وزیراعظم دے معاون خصوصی انجینئر امیر مقام وی خطاب کیتا
