اسلام آباد 21 دسمبر 2020 (ٹی این ایس): وفاقی وزیر برائے مواصلات مراد سعید کا کہنا ہے کہ قومی خزانے سے 200 کروڑ صرف رائیونڈ کی سیکیورٹی پر مامور لوگوں پر خرچ ہوئے، عمران خان نے عوام کے پیسے پر عیاشی کا کلچر ہمیشہ کے لیے دفن کردیا۔
تفصیلات کے مطابق وفاقی وزیر برائے مواصلات مراد سعید نے وزیر اعظم عمران خان کے ماتحت اداروں کی جواب دہی کو مثالی قرار دیتے ہوئے اپوزیشن کو آئینہ دکھا دیا، ماضی میں کیمپ آفسز کے نام پر کیسے لوٹ مار ہوئی، وفاقی وزیر نے دستاویزات جاری کردیں۔
مراد سعید کا کہنا تھا کہ وزیر اعظم نے ذاتی پیسے سے خریدے گھر سے متعلق ماتحت محکمے کو جوابدہی کی، وزیر اعظم کا عمل اعلیٰ اخلاقی معیار اور اداروں کی بالا دستی کی مثال قائم کر گیا۔
انہوں نے کہا کہ ماضی میں وزرائے اعظم اداروں کی آزادی اور بالا دستی کو دباتے رہے، سابق سربراہان نے سرکاری افسران کو گھر بلا کر ذاتی ناجائز کام نکلوائے، ایک طرف سند یافتہ اشتہاری دوسری طرف صادق اور امین وزیر اعظم، عمران خان نے وزیر اعظم بننے سے پہلے ذاتی پیسے سے بنے ذاتی گھر کا حساب دیا۔
مراد سعید کا کہنا تھا کہ وزیر اعظم بننے کے بعد بھی عمران خان ذاتی گھر میں رہائش پذیر ہیں، ماضی کے حکمرانوں کی طرح ملکی خزانہ کیمپ آفسز کے قیام پر نہیں اڑایا، وزیر اعظم کا نہ کوئی کیمپ آفس ہے نہ بیرون ملک ذاتی دورے، عدالتوں سے سند یافتہ مجرم اور اشتہاری کس منہ سے بات کرتے ہیں؟
انہوں نے کہا کہ عوامی منصوبوں میں کرپشن اور ذاتی رہائش گاہوں کو کیمپ آفسز بنا کر عوام کو لوٹا گیا، رائیونڈ کی چار دیواری سے کیمروں اور سڑک تک عوام کے پیسے سے بنائی گئی، اخلاقیات کا درس تب کہاں تھا جب سیکیورٹی کے نام پر کروڑوں روپے اڑائے گئے، قومی خزانے سے 200 کروڑ صرف رائیونڈ کی سیکیورٹی پر مامور لوگوں پر خرچ ہوئے۔
مراد سعید کا کہنا تھا کہ کیمپ آفسز میں انٹرٹینمنٹ کے نام پر عوام کے کروڑوں روپے خرچ کیے گئے، وزیر اعظم نے عوام کے پیسے پر عیاشی کا کلچر ہمیشہ کے لیے دفن کردیا، وزیر اعظم اب تک اپنے دفتری اخراجات میں 50 فیصد سے زائد کمی کر چکے ہیں۔
انہوں نے کہا کہ وزیر اعظم نے کوئی نجی دورہ کیا نہ عوام کا پیسہ ضائع ہونے دیا، سرکاری دوروں میں لاؤ لشکر اور خاندان کے افراد کو نوازنے کا سلسلہ ختم کردیا، سرکاری دوروں میں ذاتی مقاصد اور کاروبار کے بجائے پاکستان اور اسلام کا مقدمہ لڑا اور قوم کے کروڑوں بچا کر اعلیٰ اخلاقی مثال قائم کی۔
