مقدمے میں 13 مقامی سمیت 400 سے زائد نامعلوم افراد نامزد، ہنگامہ آرائی اوردہشت گردی کی دفعات شامل۔
کراچی جولائی2(ٹی این ایس) چیئرمین پیپلز پارٹی بلاول بھٹو زرداری کے قافلے پر لیاری میں پتھراؤ کرنے والے افراد کے خلاف مقدمہ درج کرلیا گیا۔پولیس کے مطابق سرکار کی مدعیت میں درج مقدمے میں 13 مقامی افراد اور 400 سے زائد نامعلوم افراد کو نامزد کیا گیا ہے۔ پولیس کا کہنا ہے کہ مقدمے میں حاجی باوا، رفیق بنگورہ اور اسماعیل سمیت 13 مقامی افراد کو نامزد کیا گیا ہے جب کہ مقدمے میں بلوا کرنے، ہنگامہ آرائی اور دہشت گردی کی دفعات شامل کی گئی ہیں۔
یاد رہے کہ گزشتہ روز چیئرمین پیپلز پارٹی بلاول بھٹو زرداری اپنے حلقہ انتخاب این اے 246 لیاری پہنچے اور ریلی کی صورت میں انتخابی مہم کا آغاز کیا۔تاہم جیسے ہی ان کی ریلی بہار کالونی پہنچی تو علاقہ مکینوں کی بڑی تعداد سڑکوں پر نکل آئی اور چیئرمین پیپلز پارٹی کے قافلے کو روک لیا۔
مشتعل مظاہرین نے پیپلز پارٹی کے خلاف نعرے بازی کی اور بلاول بھٹو کے قافلے میں موجود گاڑیوں پر پتھراؤ کیا اور ڈنڈے بھی برسائے۔دوسری جانب بلاول بھٹو زرداری نے اپنے ٹوئٹر بیان میں کہا کہ پتھراؤ احتجاج نہیں ہوتا، جب کوئی پتھر مارتا ہے تو وہ احتجاجی نہیں شر پسند بن جاتا ہے، لیاری کے لوگوں پر فخر ہے جنہوں نے تشدد کی سیاست کا جواب نہیں دیا۔
