امیر ترین شخصیات میں شمار ہونے کے باوجود بل گیٹس کی سادگی کو خوب پذیرائی ملی
امریکہ جنوری 17 (ٹی این ایس): امریکی شہر سیٹل میں دنیا کی امیر ترین شخصیات میں شمار ہونے والے مائیکروسافٹ کے بانی بل گیٹس کو ایک فاسٹ فوڈ ریسٹورنٹ کے باہر قطار میں کھڑے دیکھ کر آس پاس موجود حیران ہو گئے۔بل گیٹس کی فاسٹ فوڈ ریسٹورنٹ کے باہر بغیر کسی پروٹوکول کے نہایت سادگی سے قطار میں کھڑے ہونے کی تصویر انٹرنیٹ پر وائرل ہو گئی جسے خوب پذیرائی ملی۔ اس تصویر میں بل گیٹس کو فاسٹ فوڈ ریسٹورنٹ کے باہر جیب میں ہاتھ ڈالے کھڑا ہوا دیکھا گیا اور جب ریسٹورنٹ کے ملازم نے انہیں دیکھا تو انہوں نے انتہائی اطمینان سے کہا کہ مجھے ایک ڈیلکس اور ساتھ فرائز چاہئیں۔اس تصویر کو سماجی رابطے کی ویب سائٹ فیس بُک پر ایک صارف مائیک گیلوس کی جانب سے شئیر کیا گیا۔ مائیک نے کہاکہ بل گیٹس نے ریسٹورنٹ کے باہر کھڑے ہو کر یاک آدمی کی طرح ہی برگر ، فرائز اور کوک کا آرڈر دیا۔ دنیا کے اصل امیر لوگ ایسا ہی رویہ اپناتے ہیں اور ایک عام آدمی کی طرح سادگی میں رہتے ہیں۔
سوشل میڈیا پر بل گیٹس کی اس تصویر پر کئی طرح کے تبصرے کیے جا رہے ہیں۔سوشل میڈیا صارفین کا کہنا تھا کہ بل گیٹس کا اتنا امیر ہو کر بھی اتنی سادگی سے قطار میں لگ جانا اور اپنی باری کا انتظار کرنا بلا شُبہ حیران کُن ہے۔ سوشل میڈیا پر کئی صارفین نے مائیکروسافٹ کے بانی بل گیٹس اور مارک زکربرگ کی مثالیں دیتے ہوئے کہا کہ دنیا کی امیر ترین شخصیات میں شمار ہونے والے افراد کی سادگی ہی ان کی اصل پہچان ہے۔ ان کو کبھی کسی برانڈڈ کپڑوں میں نہیں دیکھا گیا نہ ہی انہیں اپنی پوزیشن کا فائدہ اُٹھاتے اور اپنے ارد گرد کے لوگوں کو پروٹوکول اورسکیورٹی سے پریشان کرتے ہوئے دیکھا گیا ہے، اور شاید یہی سادگی اور یہی مزاج ان کی کامیابیوں کا راز ہے۔
