اسلام آباد اکتوبر 07 (ٹی این ایس): سپریم کورٹ نے سابق ایس ایس پی ملیر رائو انوار کا نام ای سی ایل سے نکالنے کیلئے دائر نظرثانی کی درخواست کی سماعت آئندہ جمعہ کو مقرر کرنے کی استدعا مسترد کردی اور کہا ہے کہ یہ کیس سماعت کیلئے دوہفتے میں مقرر کرلیا جائے گا ، پیرکوجسٹس عمرعطابندیال کی سربراہی میں تین رکنی بنچ نے کیس کی سماعت کی، موقع پر دوسرے فریق کے وکیل نے عدالت سے کیس کی سماعت ملتوی کرنے کی استدعا کی اورکہا کہ وہ بیمار ہیں اورعلالت کے باعث ان کیلئے دلائل دینا ممکن نہیں، جبکہ رائو انوار کے وکیل نے استدعا کی کہ کیس کی سماعت جمعہ کو مقررکی جائے، تاہم عدالت نے ان کی استدعا مسترد کر تے ہوئے کہا کہ ممکن ہے اس کیس کی سماعت طول پکڑ جائے، جبکہ جمعہ کے دن طویل کیس نہیں سنے جا سکتے ، جسٹس اعجازالاحسن نے ان سے کہا کہ آخرسپریم کورٹ میں آپ کو کیا جلدی ہے، اگرآپ نے ای سی ایل سے نام نکلوانا ہے تو ٹرائل کورٹ سے رجوع کریں، جس پررائو انوار کے وکیل نے کہاکہ رائو انوار کا نام سپریم کورٹ کے حکم پر ای سی ایل میں ڈالا گیا اس لئے اب ہم ٹرائل کورٹ نہیں جا سکتے ، جس پربنچ کے سربراہ نے کہاکہ یہ کیس دو ہفتے تک دوبارہ مقرر ہو جائے گا، بعدازاں عدالت نے مزید سماعت ملتوی کردی ۔
