اسلام آباد 09 جون 2020 (ٹی این ایس): کرپشن میں ملوث سی اے اے کے اہل کاروں کو سزائیں دینے کا عمل شروع کر دیا گیا ہے، اہل کاروں نے لاہور ایئرپورٹ کارگو میں سروس چارجز کی مد میں 7 کروڑ روپے کی کرپشن کی تھی۔
کرپشن کے معاملے کی انکوائری رپورٹ بھی سامنے آ گئی، سی اے اے گریڈ ٹو کے آفیسر فرحان احمد کو نوکری سے معطل کر دیا گیا ہے، جب کہ گریڈ ٹو کے آفیسر بختاور گل کو ایک گریڈ تنزلی کی سزا دی گئی۔
انکوائری رپورٹ میں کہا گیا ہے کہ کارگو سروس چارجز کی مد میں سی اے اے اہل کاروں نے سات کروڑ کا فراڈ کیا تھا، اہل کاروں نے سروس چارجز کے پیسے خزانے میں جمع نہیں کرائے، ملزمان کو سی سی ٹی وی کیمروں کی فوٹیج کے ذریعے پکڑا گیا۔
انکوائری رپورٹ کے مطابق فراڈ میں ملوث اہل کاروں نے 2 کروڑ روپے کی رقم بھی خزانے میں جمع کرا دی ہے۔
