اسلام آباد 09 جولائی 2020 (ٹی این ایس): راولپنڈی چیمبر آف کامرس اینڈ انڈسٹری کے وفد نے صدر صبور ملک اور گروپ لیڈر سہیل الطاف کی قیادت میں جمعرات کو سینٹورس مال میں جاری مقدس نوادرات اور متبرکات کی نمائش کا دورہ کیا اور غلاف کعبہ، پردہ باب الکعبہ، چادر روضہ رسول اور دیگر متبرکات کی زیارت کی. چیمبر کے وفد میں سینئر نائب صدر نوشیروان خلیل خان، نائب صدر حمزہ سروش اور ایگزیکٹو کمیٹی کے ارکان محمد امتیاز چودھری، شہزاد احمد ملک، عثمان اشرف، عبدالباسط ملک، افضال سعید بٹ، محمد عثمان ایوب، محمد عالم چغتائی، محمد اکرم، مسز فلک انجم، طاہر تاج بھٹی، ملک جمشید احمد، اکرام الرحمٰن عباسی، ندیم اقبال کھوکھر اور شہریز اشرف ملک شامل تھے. وفد کے ارکان مقدس نوادرات اور متبرکات کا روح پرور منظر دیکھ کر بہت متاثر ہوئے اور عقیدت کا اظہار کیا. صدر راولپنڈی چیمبر صبور ملک اور گروپ لیڈر سہیل الطاف نے چیئرمین پنجاب انوسٹمنٹ بورڈ سردار تنویر الیاس خان اور سینئر وائس پریزیڈنٹ سینٹورس مال سردار یاسر الیاس خان کو خراج تحسین پیش کیا اور ان کے اس جذبے کی تعریف کی کہ انہوں نے جڑواں شہروں کے عوام کی روحانی تسکین کیلئے متبرک نوادرات کی زیارت کا موقع فراہم کیا. انہوں نے کہا کہ کورونا وبا کی وجہ سے لوگ خانہ کعبہ اور روضہ رسول نہیں جا سکتے، ان حالات میں وہ ان متبرکات کی زیارت کر کے روحانی سکون و اطمینان حاصل کر سکتے ہیں. چیمبر کے عہدیداران نے کہا کہ یہ امر نہایت اطمینان بخش ہے کہ مال میں کورونا وبا سے بچاؤ کے ایس او پیز پر مکمل عملدرآمد کیا جا رہا ہے اور لوگ محفوظ ماحول میں متبرکات کی زیارت سے مستفید ہو رہے ہیں. وفد کے ارکان کا کہنا تھا کہ غلاف کعبہ، پردہ باب الکعبہ، چادر روضہ رسول اور دیگر متبرکات کی زیارت سے کورونا وبا سے پریشان لوگوں کو اضطراب اور ڈپریشن کی کیفیت سے نکلنے کا موقع ملے گا. انہوں نے کہا کہ نمائش کا انعقاد اللہ کی خوشنودی کے حصول اور لوگوں کیلئے اظہار عقیدت اور روحانی تسکین کا ذریعہ بنے گا. چیمبر کے وفد نے وبا کے چیلنجز کے باوجود نہایت محفوظ ماحول میں نمائش کے کامیاب انعقاد پر سینٹورس مال کی انتظامیہ کو مبارکباد دی. مال انتظامیہ نے نمائش کا دورہ کرنے پر چیمبر کے عہدیداروں کا شکریہ ادا کیا. نمائش 24 جون کو شروع ہوئی تھی اور 15 جولائی تک جاری رہے گی.
