اسلام آباد 10 جو؛ائی 2021 (ٹی این ایس): پیپلزپارٹی نے چییئرمین بلاول بھٹو کے دورہ امریکا کے پیش نظر آصفہ بھٹو کو میدان میں اتارنے کا فیصلہ کیا ہے ، آصفہ بھٹو آزاد کشمیرمیں پارٹی کی انتخابی مہم چلائیں گی۔
تفصیلات کے مطابق پیپلزپارٹی نے چییئرمین بلاول بھٹو کی عدم موجودگی میں آصفہ بھٹو کو میدان میں اتارنے کا فیصلہ کرلیا ہے ، پی پی ذرائع کا کہنا ہے کہ بلاول کی عدم موجودگی میں آصفہ بھٹوآزادکشمیرکادورہ کریں گی۔
ذرائع پیپلزپارٹی کا کہنا تھا کہ آصفہ بھٹو آزاد کشمیرمیں پارٹی کی انتخابی مہم چلائیں گی او آزادکشمیرمیں جلسوں،ریلیوں سےخطاب کریں گی۔
خیال رہے چیئرمین پیپلزپارٹی بلاول بھٹو آج دوپہرکو کراچی سےامریکاروانہ ہوں گے ، بلاول بھٹو زرداری ایک ہفتہ امریکا میں قیام کریں گے۔
دورے کے دوران بلاول بھٹو امریکامیں اہم رہنماؤں سے ملاقات کریں گے اور ایک کانفرنس میں بھی شرکت کریں گے۔
وزیراعلیٰ سندھ مرادعلی شاہ پہلے ہی امریکاموجود ہے ، امکان ظاہر کیا جارہا ہے کہ مراد علی شاہ بھی بلاول بھٹو کے ساتھ مل کر مختلف سیاسی سرگرمیوں میں حصہ لیں گے، ذرائع کا کہنا تھا کہ مراد علی شاہ امریکا میں مختلف عالمی سیاسی شخصیات سے ملاقاتیں کریں گے۔
یاد رہے پاکستان پیپلزپارٹی کے رہنما نبیل گبول نے بتایا تھا کہ بلاول بھٹو کسی کی منت سماجت کرنے امریکا نہیں جارہے، انہیں امریکی سینیٹرز نے امریکا کے دورے کی دعوت دی، وہ پاکستان کا مقدمہ لڑنے کے لیے ہی جارہے ہیں۔
