اسلام آباد 17 ستمبر 2021 (ٹی این ایس): بینک دولت پاکستان نے برابری پر بینکاری پالیسی کے ذریعے مالی شعبے میں صنفی تنوع اور شمولیت کو ترقی دینے کے لیے سازگار ماحول کی فراہمی کے سلسلے میں اہم قدم اٹھا لیا۔
صدر پاکستان ڈاکٹر عارف علوی اسٹیٹ بینک آف پاکستان کی ’برابری پر بینکاری‘ پالیسی کا 17 ستمبر 2021 کو اسلام آباد میں افتتاح کریں گے۔
’برابری پر بینکاری‘ پالیسی اسٹیٹ بینک کا نمائندہ پالیسی اقدام ہے، جس کا مقصد مالی شمولیت میں صنفی فرق کو کم کرنا ہے، پالیسی ٹیگ لائن ’مالی شمولیت صنفی امتیاز کے بغیر‘ کا مقصد خواتین دوست کاروباری پالیسیاں اور روایات اختیار کر کے بینکاری شعبے میں بنیادی تبدیلی متعار ف کرانا ہے۔
اس پالیسی کا بنیادی تصور مالی خدمات تک خواتین کی رسائی کو بہتر بنانا ہے، اس کے تحت خواتین کے لیے مخصوص مصنوعات کی پیش کش کی جائے گی جو ان کی مالی ضروریات پوری کرنے میں مدد کریں گی۔
پالیسی کے تحت صارف کے بہتر تجربے کے لیے تمام صارفی ٹچ پوائنٹس پر خواتین کے لیے الگ سہولتیں فراہم کی جائیں گی، خواتین کی مالی شمولیت کو ترجیح دی جائے گی۔
اسٹیٹ بینک کے مطابق یہ پالیسی ملکی اور بین الاقوامی، فکری اور صنفی ماہرین دونوں متعلقہ فریقوں سے جامع مشاورت کے بعد تیار کی گئی ہے۔
