اسلام آباد جولائی 30(ٹی این ایس )پاکستان مسلم لیگ (ن) کی جانب سے نئے وزیراعظم کیلئے نامزد امیدوار اور رکن اسمبلی شاہد خاقان عباسی نے کہا ہے کہ سپریم کورٹ کا فیصلہ نہ عوام نے قبول کیا اور نہ ہی تاریخ قبول کریگی ٗ نواز شریف کے ایجنڈے کو آگے لیکر چلونگا ٗ تیس سال سے سیاست میں ہوں ٗ کسی ریفرنس سے نہیں ڈرتا ۔ اتوار کو نامزد وزیر اعظم شاہد خاقان عباسی نے جے یو آئی (ف)کے سربراہ مولانا فضل الرحمن سے ملاقات کی اور جس میں انہوں نے وزارت عظمیٰ کیلئے ووٹ دینے کی درخواست کی ہے جس پر مولانا فضل الرحمن نے اپنی مکمل حمایت کا یقین دلایا ۔ملاقات کے بعد میڈیا سے بات چیت کرتے ہوئے شاہد خاقان عباسی نے کہا کہ مجھے مسلم لیگ (ن) نے وزیراعظم کیلئے نامزد کیا ہے ٗ میرا فرض ہے کہ تمام سیاسی جماعتوں اور اراکین قومی اسمبلی سے رابطے کروں اسی سلسلے میں مولانا فضل الرحمان کے پاس آیا ہوں اور یہ ہماری اتحادی ہیں اور مولانا فضل الرحمن سے حمایت مانگی ہے تاہم یہ ووٹر کی مرضی ہے کہ وہ اپنی پسند کے مطابق فیصلہ کرے۔انہوں نے کہاکہ مولانا فضل الرحمن کا شکریہ ادا کرتا ہوں کہ انہوں نے ماضی کی طرح اب بھی ملک وقوم کی بہتری کیلئے سابق وزیر اعظم نواز شریف کی پالیسیوں کو آگے بڑھانے کیلئے ہمارے ساتھ تعاون کرینگے اور ان کی معاونت حاصل رہے گی ایک سوال کے جواب میں نامزد وزیراعظم شاہد خاقان عباسی نے کہا کہ نوازشریف کی نااہلی سے متعلق عدالتی فیصلے پر من وعن عمل درآمد کر دیا ہے مگر اس عدالتی فیصلے کو نہ پاکستان کے عوام نے قبول کیا ہے نہ عالمی سطح پر اور نہ تاریخ اسے قبول کریگی ۔ایک سوال کے جواب میں انہوں نے کہا کہ ان کے خلاف ایک نہیں کوئی دس ریفرنسز لے آئے کسی ریفرنس سے نہیں ڈرتا ، 30سال سے سیاست میں ہوں ، ہر الیکشن میں حلقے کے عوام نے پہلے سے زیادہ اعتماد کا اظہار کیا ہے جس کا میں شکر گزار ہوں ، میرے تمام اثاثے پاکستان میں ہیں اس کے علاوہ میرے کوئی اثاثے نہیں ہیں ٗ الزامات لگانے والے اپنے گریبان میں جھانکیں اور اپنی بہتان تراشی کے حوالے سے سزا بھگتنے کیلئے بھی تیار رہیں ۔ ایک سوال کے جواب میں انہوں نے کہا کہ کابینہ کے بارے میں ابھی کوئی فیصلہ نہیں ہوا مشاورت ہورہی ہے ایک اور سوال پر انہوں نے کہاکہ چوہدری نثار علی خان پہلے بھی پارٹی کیلئے اہم تھے ، اب بھی اہم ہیں اور ہمیشہ اہم رہیں گے اس معاملے پر مزید بات کرنے کی ضرورت نہیں ہے ۔انہوں نے کہاکہ مسلم لیگ (ض) کے سربراہ اعجازالحق سے میری 48سالوں سے دوستی ہے اور انہوں نے تجویز کنندہ بننے کی خواہش ظاہر کی ہے ۔ شاہد خاقان عباسی نے کہا کہ غیر ملکی اقامہ غیر قانونی نہیں ہے اس معاملے پر ہر کوئی قوانین کی اپنی اپنی تشریح کر رہا ہے ، عدالت ہی بہتر فیصلہ کرسکتی ہے تاہم اقامہ کو رہائشی ویزہ کی حیثیت حاصل ہوتی ہے اور اقامہ کی بنیاد پر کسی کو نااہل قرارنہیں دیا جا سکتا ۔ میڈیا سے بات چیت کرتے ہوئے مولانا فضل الرحمان نے کہا کہ نئے مستقبل کے حوالے سے فیصلے ہو رہے ہیں ۔انہوں نے کہا کہ قیادت کی ذمہ داری ہوتی ہے کہ وہ ملک میں کوئی سیاسی بحران پیدا نہ ہونے دیں ۔ پارلیمانی پارٹی کا اجلاس طلب کر لیا ہے تا کہ اس بارے میں باقاعدہ طور پر فیصلہ کیا جا سکے
