اسلام آباد 13 مارچ 2022 (ٹی این ایس): اپوزیشن نے اسد قیصر اور قاسم سوری کےخلاف تحریک عدم اعتماد کا مسودہ جمع کرا دیا مسودے پر ایک سو سے زائد اراکین کے دستخط ہیں۔
تحریک کے مسودے میں اسپیکر اور ڈپٹی اسپیکر پر جانبداری کے الزامات لگاتے ہوئے لکھا گیا ہے کہ دونوں نے اب تک پارٹی عہدوں سے بھی استعفیٰ نہیں دیا، دونوں ایوان کو اپنی پارٹی ہدایات کے مطابق چلاتے رہے اور دونوں نیوٹرل رہنے کی بجائے فریق بنتے رہے۔
مسودے کے مطابق اسد قیصر اور قاسم سوری وزیر اعظم کی زیر صدارت اجلاسوں میں بھی شریک ہوتے رہے ہیں۔
پیر کو اپوزیشن کے سربراہی اجلاس میں اسپیکر اور ڈپٹی اسپیکر سے متعلق فیصلہ متوقع ہے۔
اپوزیشن جماعتوں نے چیئرمین سینیٹ صادق سنجرانی کے خلاف بھی تحریک پیش کرنے کا فیصلہ کیا ہے۔
