اسلام آباد 07 اپریل 2022 (ٹی این ایس): پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ ہم ملک کو انتشار سے بچانا چاہتے ہیں۔
پی ڈی ایم کے سربراہ مولانا فضل الرحمان نے میڈیا سے گفتگو کرتے ہوئے کہا کہ پاکستان کے وفاقی پارلیمانی نظام کے تحفظ کے لیے آخری حد تک جائیں گے۔ خط آ چکا تھا اس کے بعد آپ بہادر آباد میں ایم کیو ایم پاکستان کی قیادت سے ملے لیکن اس وقت بھی آپ نے اپنے اتحادی سے خط کا ذکر نہیں کیا۔
انہوں نے کہا کہ جب تحریک عدم اعتماد پیش ہو گئی تو آپ کو خط یاد آ گیا جو کہ جمہوریت کے لبادے میں بدترین ڈکٹیٹر شپ ہے۔ ہم پاکستانی عوام کی عدالت میں بھی جائیں گے لیکن ڈپٹی اسپیکر کی رولنگ کو کسی صورت قبول نہیں کریں گے۔
سربراہ پی ڈی ایم نے کہا کہ تحریک عدم اعتماد آئین شکنی سے مسترد کرنا غیر آئینی عمل ہے جبکہ پنجاب میں کون سا خط آیا جو اسمبلی میں ہلڑ بازی کی گئی۔ تم نے پنجاب میں ہلڑ بازی کرائی، یہ جمہوریت نہیں ڈکٹیٹر شپ ہے۔
