اسلام آباد 03 جون 2022 (ٹی این ایس): وفاقی وزیر داخلہ رانا ثنااللہ کی زیر صدارت کابینہ کمیٹی کا اجلاس ہوا جس میں چیئرمین تحریک انصاف عمران خان اور وزیراعلیٰ کے پی محمود خان کے خلاف بغاوت کے مقدمے پر غور کیا گیا۔
ذرائع کے مطابق اجلاس میں وفاقی وزیر داخلہ رانا ثنااللہ نے عمران خان کے خلاف مقدمہ درج کرنےکے لیے کمیٹی سے استدعا کی۔
رانا ثنااللہ نےکہا کہ عمران خان کا لانگ مارچ مسلح جتھوں کے ساتھ وفاق پر حملہ تھا، پولیس افسران اور اسلحہ عمران خان کے ساتھ تھا، اس کے شواہد ہیں۔
ذرائع کے مطابق اجلاس میں وزیر اعلیٰ گلگت بلتستان کے خلاف بھی بغاوت کے مقدمے پر غور کیا گیا۔
اجلاس میں آئی جی اسلام آباد اکبر ناصر نے کابینہ کمیٹی کے ارکان کو بریفنگ دی، کابینہ کمیٹی کے شرکاء آئندہ ہفتے دوبارہ ملاقات کریں گے۔
ذرائع کا کہنا ہےکہ وزارت داخلہ کے مطابق 25 مئی کو وفاق پر مسلح چڑھائی اور وفاق و صوبوں سے عدم وفاداری کی گئی، عمران خان کو دفعہ124 کے تحت عمرقید اور جرمانے کی سزا ہوسکتی ہے۔
