اسلام آباد 21 جون 2022 (ٹی این ایس): پی ٹی آئی ممنوعہ فنڈنگ کیس کے درخواست گزار اکبر ایس بابر نے کہا ہے کہ امید ہے کیس کا فیصلہ پاکستانی سیاست میں انقلاب لائے گا۔
الیکشن کمیشن کے باہر اکبر ایس بابر نے وکلاء کے ہمراہ میڈیا سے گفتگو کے دوران کہا کہ چاہتے ہیں کہ غیر قانونی فنڈنگ پر جامع تحقیقات ہوں۔
ان کا کہنا ہے کہ کیس الیکشن کمیشن میں لانا ذاتی مفاد کے لیے نہیں تھا، فارن فنڈنگ کیس کا فیصلہ محفوظ ہونا خوش آئند ہے، امید ہے اللّٰہ تعالیٰ ہمیں کامیاب کریں گے۔
اکبر ایس بابر نے کہا کہ 20 ہزار آسٹریلین ڈالر اور 27 ہزار یورو سمیت بھاری رقوم پی ٹی آئی کے اکاؤنٹ میں منتقل ہوئیں۔
ان کا کہنا ہے کہ سابق حکومت نے ملکی معیشت کو تباہ کر دیا، عمران خان خود کو احتساب سے بالاتر سمجھتے ہیں۔
اکبر ایس بابر کا کہنا ہے کہ سابق وزیرِ اعظم عمران خان کے کزن بھی اس کیس میں ہمارے ساتھ شامل رہے۔
انہوں نے مزید کہا کہ ووٹر کا اعتماد بحال ہونے سے سیاست میں مثبت تبدیلی آئے گی۔
اکبر ایس بابر نے یہ بھی کہا کہ کیس لڑنے کا مقصد سیاسی جماعتوں کے لیے مثال قائم کرنا تھا، کیس سے متعلق دباؤ اور پابندیوں کا سامنا کیا۔
