آئی سی سی کی ٹیکنیکل کمیٹی نے پاکستانی اسکواڈ میں اَن فٹ فخر زمان کی جگہ محمد حارث کو شامل کرنے کی منظوری دے دی۔
ورلڈ کپ سے قبل گھٹنے کی انجری کا شکار فخر زمان کو پاکستان ٹیم نے اسکواڈ کا حصہ بنایا تھا۔
فخر زمان کو اُن فٹ عثمان قادر کی جگہ ورلڈ کپ اسکواڈ میں شامل کیا گیا تھا۔
فخر زمان بھارت اور زمبابوے کے خلاف تو میچ نہیں کھیلے تھے البتہ انہیں نیدرلینڈز کے خلاف میچ میں موقع دیا گیا جہاں وہ دوبارہ انجری کا شکار ہوگئے۔
ٹیم کے ڈاکٹر نجیب سومرو نے گزشتہ روز سڈنی میں میڈیا سے گفتگو میں تسلیم کیا تھا کہ انجری کا شکار فخر زمان کو کھلا کر رسک لیا گیا تھا جس میں کبھی کامیابی کبھی ناکامی ملتی ہے۔
فخر زمان کی انجری کے بعد ٹیم منیجمنٹ نے آئی سی سی کی ٹیکنیکل کمیٹی سے ریزرو کھلاڑیوں کی فہرست میں شامل محمد حارث کو شامل کرنے کی درخواست کی تھی جو منظور کرلی گئی۔
وکٹ کیپر بیٹسمین محمد حارث ریزرو کھلاڑیوں کی فہرست میں شامل تھے جو آسٹریلیا میں ٹیم کے ساتھ ٹریول کررہے ہیں۔
جنوبی افریقا کے خلاف آج اہم میچ میں فخر زمان کی جگہ محمد حارث کو موقع دیا جاسکتا ہے۔
