اسلام آباد ہائی کورٹ میں ایم کیو ایم کے قائد الطاف حسین کو شناختی کارڈ جاری کرنے سے متعلق دائر درخواست پر جسٹس محسن اختر کیانی نے سماعت کی ۔
درخواستگزار کی جانب سے انس مشہود ایڈووکیٹ کی جونیئر وکیل عدالت میں پیش ہوئے جبکہ وفاق کی جانب سے ایڈیشنل اٹارنی جنرل منور اقبال دوگل نے نمائندگی کی ۔درخواست گزار کے معاون وکیل نے عدالت کو بتایا کہ درخواستگزار کے وکیل لاہور میں کیس میں مصروف ہیں اس لیے کیس ملتوی کرنے کی استدعا ہے۔ جس پر جسٹس محسن اختر کیانی نے کہاکہ آپ نے اگلی تاریخ پر درخواستگزار کا پارٹی سے تعلق ثابت کرنا ہے،اس وقت پارٹی کے عہدیدار کون ہیں اور درخواستگزار کا پارٹی میں کیا عہدہ ہے یہ بھی عدالت کو بتانا ہے۔بعد ازاں عدالت نے کیس کی سماعت 12 جنوری تک کیلئے ملتوی کر دی۔
