توشہ خانہ فیصلے کے بعد احتجاج پر درج دہشت گردی کے مقدمے میں اسلام آباد کی انسدادِ دہشت گردی عدالت میں سابق وزیراعظم عمران خان کی عبوری ضمانت کے لئے درخواست دائر کر دی گئی ہے
عمران خان کے وکیل نعیم حیدر پنجوتھہ نے چیئرمین پی ٹی آئی کی عبوری ضمانت کی درخواست انسدادِ دہشت گردی کے جج راجہ جواد کی عدالت میں دائر کی۔
عمران خان نے درخواست میں موقف اپنایا کہ سیاسی انتقام کے باعث مقدمے میں نامزد کیا گیا، پاکستان کی بڑی سیاسی جماعت کا لیڈر ہوں، مجھ پر دہشت گردی کا مقدمہ بنایا گیا جس کا میں مرتکب نہیں ہوں۔
درخواست میں استدعا کی گئی کہ انسداد دہشت گردی عدالت کے کیس میں ضمانت کنفرم ہونے سے پہلے عبوری ضمانت منظور کی جائے۔
انسداد دہشت گردی عدالت نے عمران خان کی درخواست ضمانت عدم حاضری کے باعث خارج کر دی تھی۔ توشہ خانہ احتجاج میں تھانہ سنگجانی کے مقدمے میں عمران خان نامزد ہیں۔
