بلوچستان کے ضلع ہرنائی میں نامعلوم افراد نے چار کان کنوں کو قتل کرنے کے بعد کوئلے کی 12 کانوں اور مشینری کو آگ لگا دی۔ واقعے میں ایک مزدور زخمی بھی ہوا ہے۔
اسسٹنٹ کمشنر ہرنائی مجید جوگیزئی نے اردو نیوز کو بتایا کہ ہرنائی سے تقریباً 70 کلومیٹر کے فاصلے پر واقع خوست کی کانوں پر رات کے وقت نامعلوم افراد نے فائرنگ کرتے ہوئے مزدوروں کو نشانہ بنایا۔
’حملے میں چار مزدور ہلاک جبکہ ایک زخمی ہوا جس کو مقامی ہسپتال منتقل کیا گیا ہے۔‘
ان کا کہنا تھا کہ دو کان کنوں کے اغوا کی بھی اطلاع ملی تھی تاہم وہ خوفزدہ ہو کر چھپ گئے تھے۔
مجید جوگیزئی کا کہنا تھا کہ مرنے والوں میں سے دو کا تعلق خیبرپختونخوا جبکہ دو کا تعلق بلوچستان کے ضلع قلعہ سیف اللہ کے علاقے مسلم باغ کیمپ سے ہے۔
انہوں نے بتایا کہ ’حملہ آوروں نے کوئلے کی 12 کانوں اور باہر موجود مشینری کو بھی آگ لگائی اور اس کے بعد قریبی پہاڑوں کی طرف فرار ہو گئے۔‘
