تحریر: ریحان خان
اسلام آباد، ہفتہ، 8 فروری 2025 (ٹی این ایس): فیضان گلوبل ریلیف فاؤنڈیشن (ایف-جی-آر-ایف) نے اپنے آئندہ فلاحی منصوبوں کا اعلان کرتے ہوئے بتایا ہے کہ تنظیم فلسطینی یتیم بچوں کے لیے ایک یتیم خانہ قائم کرے گی اور غزہ میں متاثرہ خاندانوں کے لیے رہائشی منصوبہ تعمیر کرے گی۔
فاؤنڈیشن کے ترجمان محمد محمود عطاری کے مطابق، ایف جی آر ایف فلسطینی عوام کی مدد میں ہمیشہ پیش پیش رہی ہے اور اپنی انسانی ہمدردی کی کاوشوں کو جاری رکھتے ہوئے متاثرہ کمیونٹیز میں پکا ہوا کھانا تقسیم کرنے اور ٹینکرز کے ذریعے پانی فراہم کرنے جیسے اقدامات کر رہی ہے۔
فاؤنڈیشن کے صدر مولانا عبدالحبیب عطاری کی سربراہی میں ایک وفد غزہ میں امدادی کارروائیوں کو مزید مستحکم کرنے کے لیے اردن پہنچا، جہاں انہوں نے اردنی وزیر برائے اوقاف، اسلامی امور و مقدس مقامات محمد احمد مسلم الخلائلہ اور دیگر حکام سے تفصیلی ملاقات کی۔
اس موقع پر مولانا عبدالحبیب عطاری نے کہا کہ فیضان گلوبل ریلیف فاؤنڈیشن کا بنیادی مقصد فلسطینی مسلمانوں کو وسیع پیمانے پر امداد فراہم کرنا ہے، بالکل اسی طرح جیسے شام اور ترکیہ میں زلزلہ متاثرین کی مدد کی گئی تھی۔ انہوں نے بتایا کہ اب تک FGRF مختلف ذرائع سے 1,90,000 سے زائد افراد تک پکا ہوا کھانا، گدے، ادویات اور دیگر ضروری اشیاء پہنچا چکی ہے۔
انہوں نے یہ بھی انکشاف کیا کہ اس وقت مزید دو امدادی کنٹینرز تیار کیے جا رہے ہیں، جن میں ہر امدادی باکس کی قیمت 40 امریکی ڈالر (تقریباً 12,000 پاکستانی روپے) ہے۔ ہر باکس ایک خاندان کو 15 دن تک مدد فراہم کرنے کے لیے ڈیزائن کیا گیا ہے۔
دوسری جانب، محمد احمد مسلم الخلائلہ نے فلسطین اور بین الاقوامی سطح پر FGRF کی انسانی خدمات کو سراہا اور ان کے تجویز کردہ فلاحی منصوبوں کے لیے مکمل تعاون اور حمایت کی یقین دہانی کرائی۔
FGRF کے ترجمان نے امید ظاہر کی کہ مولانا عبدالحبیب عطاری کی اردنی وزیر اور دیگر حکام سے ملاقات کے بعد غزہ اور فلسطینی مسلمانوں کے لیے مختلف امدادی منصوبے جلد شروع کیے جائیں گے
