تحریر: ریحان خان
اسلام آباد، بدھ، 5 مارچ 2025 (ٹی این ایس): کنگ سلمان ہیومینیٹیرین ایڈ اینڈ ریلیف سینٹر (کے-ایس-ریلیف) نے نیشنل ڈیزاسٹر مینجمنٹ اتھارٹی (این-ڈی-ایم-اے) کے اشتراک سے پاکستان کے 33 اضلاع میں مستحق افراد کی مدد کے لیے 30,000 فوڈ پیکجز کی تقسیم کا آغاز کر دیا ہے۔ یہ اقدام رمضان المبارک کے مقدس مہینے میں ضرورت مندوں کی غذائی ضروریات پوری کرنے کے لیے کیا گیا ہے۔
“فوڈ باسکٹ پروجیکٹ پاکستان 2025” کے تحت اس مہم کا مقصد 2,10,000 افراد کو بنیادی خوراک کی فراہمی یقینی بنانا ہے تاکہ ضرورت مند افراد کو غذائی تحفظ فراہم کیا جا سکے۔
ہر فوڈ پیکج 95 کلوگرام وزنی ہے، جس میں 80 کلو آٹا، 5 لیٹر خوردنی تیل، 5 کلو چینی اور 5 کلو دال چنا شامل ہے۔ فوڈ پیکجز کی تقسیم کو شفاف بنانے کے لیے یہ عمل صوبائی ڈیزاسٹر مینجمنٹ اتھارٹیز (PDMAs)، گلگت بلتستان ڈیزاسٹر مینجمنٹ اتھارٹی (GBDMA)، اسٹیٹ ڈیزاسٹر مینجمنٹ اتھارٹی (SDMA)، مقامی ضلعی انتظامیہ، اور (کے-ایس-ریلیف) کے عمل درآمدی شراکت داروں—حیات فاؤنڈیشن اور پیس اینڈ ڈیولپمنٹ آرگنائزیشن—کے اشتراک سے انجام دیا جا رہا ہے۔
خوراک کے بحران سے نمٹنے کے لیے (کے-ایس-ریلیف) کی یہ کاوش اس کے انسانی ہمدردی کے عزم کی عکاسی کرتی ہے، جو رمضان المبارک کے دوران مستحق طبقات کو بنیادی ضروریات کی فراہمی یقینی بنانے کے لیے کوشاں ہے۔ یہ اقدام (کے-ایس-ریلیف) کے عالمی انسانی امدادی مشن کو مزید مستحکم کرتا ہے، جس کا مقصد کمزور طبقات میں استحکام، برداشت اور خوشحالی کو فروغ دینا ہے
