تاریخ میں کوئی چیز راز نہیں رہتی ،ہمارا یقین ہے میر مرتضیٰ کے قاتل بے نقاب ہی نہیں ہونگے بلکہ انہیں سزا بھی ملے گی، آصف زرداری

اسلام آباد ،ستمبر 19(ٹی این ایس): سابق صدرِ پاکستان اور پاکستان پیپلز پارٹی پارلیمنٹرینز کے صدر آصف علی زرداری نے کہا کہ میر مرتضیٰ بھٹو نے سخت ترین جلاوطنی برداشت کی، اپنی والدہ اور ہمشیرہ پر ڈکٹیٹرشپ کی جانب سے ظلم ہوتے ہوئے دیکھا، اپنے والد اور بھائی کے قتل کا صدمہ برداشت کیا لیکن انہوں نے اپنے اصولوں کو نہیں چھوڑا اور ڈکٹیٹر سے کسی بھی مفاہمت سے انکار کر دیا۔

میر مرتضیٰ بھٹو کی 21ویں برسی کے موقع پر اپنے پیغام میں انہوں نے کہا کہ جس پراسرار ماحول میں انہیں قتل کیا گیا اور اس کے بعد ان کے قتل کے تحقیقاتی افسر کو بھی پراسرار انداز میں قتل کر دیا گیا اس سے اس شک کو یہ تقویت ملتی ہے کہ ایک بھٹو کی جانب سےدوسرے بھٹو کو اس کے قتل کا الزام دیا جائے۔

انہوں نے کہا کہ تاریخ میں کوئی چیز راز نہیں رہتی اور یہ ہمارا یقین ہے کہ میر مرتضیٰ کے قاتل نہ صرف بے نقاب ہوں گے بلکہ انہیں سزا بھی ملے گی۔ آصف علی زرداری نے میر مرتضیٰ بھٹو کی روح کے ایصال ثواب اور انکے وارثوں کے لئے صبر جمیل کی  دعا  کرتے ہوئے کہا کہ میر مرتضیٰ ایک جری اور بہادر شخص تھے جنہوں نے اپنی زندگی ڈکٹیٹرشپ کے خلاف لڑنے کے لئے وقف کر دی تھی۔