اسلام آباد (ٹی این ایس)— راولپنڈی اسلام آباد یونین آف جرنلسٹس،نیشنل پریس کلب اور پارلیمنٹیر نیز کمیشن برائے انسانی حقوق کے اشتراک سے انٹرنیٹ کا منفی پھیلاؤ روکنے میں میڈیا کا کردار کے موضوع پر پریس کلب اسلام آباد میں سیمینار کا انعقاد کیا گیا تقریب کی مہمانِ خصوصی پارلیمانی سیکرٹری اطلاعات و ثقافت شازیہ رضوان تھیں۔جبکہ وزیر مملکت کھیل داس نے خصوصی طور پر شرکت کی ،تقریب سے چوہدری شفیق (سی ای او پارلیمینٹرینز کمیشن برائے انسانی حقوق)، صدر پی ایف یو جے افضل بٹ، صدر راولپنڈی اسلام آباد یونین آف جرنلسٹس طارق علی ورک، نیشنل پریس کلب کے صدر اظہر جتوئی، سیکرٹری نیشنل پریس کلب نیئر علی، پی ایف یو جے کے سابق سیکرٹری جنرل ناصر زیدی، اور پی آر اے کے سیکرٹری چوہدری نوید اکبر نے بھی خطاب کیا۔مہمانِ خصوصی شازیہ رضوان نے کہا کہ محنت کبھی رائیگاں نہیں جاتی، نیک نیتی سے کی جانے والی کوششیں ضرور رنگ لاتی ہیں۔ انہوں نے کہا کہ صحافت ایک مقدس پیشہ ہے اور آج کے دور میں ڈیجیٹل اور سوشل میڈیا کی اہمیت بڑھ چکی ہے، اس لیے مثبت اور تعمیری سوچ کو فروغ دینا ضروری ہے۔ ان کا کہنا تھا کہ وزیر اعلیٰ پنجاب صحافیوں کے مثبت کردار کی ہمیشہ تعریف کرتی ہیں۔وزیر مملکت کھیل داس و رکنِ اسمبلی نے اپنے خطاب میں کہا کہ وہ پریس کلب کو اپنا گھر سمجھتے ہیں۔ انہوں نے کہا کہ جدید ٹیکنالوجی نے صحافت کے انداز بدل دیے ہیں، اس لیے تنقید کو برداشت کرنا اور حقائق پر مبنی رپورٹنگ کرنا ضروری ہے۔ ان کا کہنا تھا کہ فیک نیوز زیادہ تیزی سے پھیلتی ہیں لیکن ڈیجیٹل سسٹمز کے فروغ سے کرپشن میں کمی آئے گی۔پی ایف یو جے کے صدر افضل بٹ نے کہا کہ صحافیوں کو بدلتے حالات کے ساتھ چلنا ہوگا اور جدید دور کے تقاضوں کے مطابق خود کو ڈھالنا ہوگا۔انہوں نے کہا کہ سوشل میڈیا وہی دکھاتا ہے جو معاشرے میں ہو رہا ہوتا ہے، جبکہ ڈس انفارمیشن اکثر منصوبہ بندی کے تحت پھیلائی جاتی ہے۔
راولپنڈی اسلام آباد یونین آف جرنلسٹس کے صدر طارق علی ورک نے کہا کہ ڈیجیٹل میڈیا ایک حقیقت ہے جسے نظرانداز نہیں کیا جاسکتا، اس لیے صحافیوں کو اس کے ٹولز کے استعمال میں مہارت حاصل کرنا ہوگی۔ انہوں نے کہا کہ مثبت اور تعمیری صحافت ہی وقت کی ضرورت ہے۔صدر نیشنل پریس کلب اظہر جتوئی نے کہا کہ ہم ایسے دور میں داخل ہوچکے ہیں جہاں ہر لمحہ نئی تبدیلیاں سامنے آ رہی ہیں، اس لیے صحافیوں کو مسلسل سیکھنے کے عمل میں شامل رہنا ہوگا سیکرٹری نیشنل پریس کلب نیئر علی نے کہا کہ جدید صحافت کا مستقبل ڈیجیٹل میڈیا سے وابستہ ہے اور صحافی برادری کو ذمہ دارانہ رپورٹنگ اور فیک نیوز کے خاتمے کے لیے متحد ہو کر کام کرنا ہوگا۔کشمیر بار کونسل کے چیئرمین طارق بشیر نے کہا کہ اس طرح کی ورکشاپس موجودہ دور کے لیے انتہائی ضروری ہیں، ورکشاپ سے خطاب کرتے ہوئے اسد بیگ نے کہا کہ ڈیجیٹل میڈیا کے بے قابو پھیلاؤ نے معاشرتی ہم آہنگی، عوامی شعور اور صحافتی ذمہ داریوں کو نئے چیلنجز سے دوچار کر دیا ہے۔ ورکشاپ میں میڈیا ماہرین، صحافیوں اور طلبا کی بڑی تعداد نے شرکت کی، جہاں شرکاء کو جدید میڈیا رجحانات، فیک نیوز کے تدارک اور ذمہ دارانہ رپورٹنگ کی عملی تربیت فراہم کی گئی۔مقررین نے کہا کہ سوشل میڈیا کے دور میں خبر کی رفتار بہت تیز ہو چکی ہے، لیکن بدقسمتی سے درستگی کی رفتار اس کے مقابلے میں کم ہے۔ انہوں نے کہا کہ غلط معلومات، جعلی ویڈیوز اور غیر مصدقہ خبریں قومی سطح پر انتشار پھیلا سکتی ہیں، اس لیے صحافیوں پر لازم ہے کہ وہ خبر نشر کرنے سے پہلے ٹھوس تحقیق اور تصدیق کو اولین ترجیح دیں۔ شرکاء کو بتایا گیا کہ میڈیا کا اصل کردار صرف خبریں پہنچانا نہیں بلکہ عوام کو درست سمت میں رہنمائی فراہم کرنا ہے۔ورکشاپ سے خطاب کرتے ہوئے ماہرین نے کہا کہ فیکٹ چیکنگ کے لیے جدید طریقوں اور ڈیجیٹل ٹولز کا استعمال وقت کی اہم ضرورت ہے۔ انہوں نے کہا کہ نوجوان صحافیوں کو چاہیے کہ وہ پیشہ ورانہ اخلاقیات، تحقیقاتی صحافت اور ڈیجیٹل سکیورٹی جیسے موضوعات پر مہارت حاصل کریں تاکہ وہ بدلتے ہوئے میڈیا ماحول میں مؤثر کردار ادا کر سکیں۔ مقررین نے اس بات پر زور دیا کہ سنسنی خیزی، بے بنیاد اطلاعات اور پروپیگنڈا نہ صرف صحافت کے معیار کو متاثر کرتے ہیں بلکہ معاشرے میں بے اعتمادی بھی بڑھاتے ہیں۔شرکاء نے ورکشاپ کے انعقاد کو مثبت قدم قرار دیتے ہوئے کہا کہ اس طرح کے تربیتی پروگرام نہ صرف صحافیوں کی صلاحیتوں میں اضافہ کرتے ہیں بلکہ ذمہ دارانہ صحافت کے فروغ میں بھی اہم کردار ادا کرتے ہیں۔ ورکشاپ کے اختتام پر سوال جواب کا سیشن بھی ہوا جس میں نئے صحافیوں نے اپنے سوالات پیش کیے اور سینئر ماہرین نے رہنمائی فراہم کی۔ نیشنل پریس کلب میں انٹرنیٹ کے منفی استعمال کو روکنے میں میڈیا کے کردار کے موضوع پر منعقدہ سیمینار سے مختلف سیاسی، صحافتی اور سماجی شخصیات نے خطاب کیا جبکہ ۔ورکشاپ میں راولپنڈی اسلام اباد یونین اف جرنلسٹس کے سنیر ناہب صدر راجہ بشیر عثمانی نیشنل پریس کلب کے ناہب صدر احتشام الحق ممبران ایگزیکٹو باڈی نیشنل پریس کلب علی اختر غفران چشتی سابق صدور ار اثئ یوجے عامر سجاد سید عابد عباسی سابق فنانس سیکرٹری نیشنل پریس کلب صغیر چوہدری ،رانا عدنان سمیت سینئر صحافیوں نے شرکت کی
