لاہور،ستمبر22 (ٹی این ایس): لاہور الیکٹرک سپلائی کمپنی( لیسکو) نے یکم تا 10 محرم الحرام، مجالس کے دوران امام بارگاہوں میں بجلی کی بلا تعطل فراہمی کو یقینی بنانے اور کسی بھی ایمرجینسی کی صورت میں ٹیمیں تشکیل دینے کا فیصلہ کرلیا ہے۔
یہ فیصلہ جمعرات کو لیسکو ہیڈ آفس میں لیسکو کے چیف ایگزیکٹو سید واجد علی کاظمی کی زیرِصدارت منوقدہ ایک اجلاس میں کیا گیا۔ اجلاس کے بعدلیسکو کے ترجمان کی جانب سے جاری ہونے والے بیان کے مطابق چیف ایگزیکٹو لیسکو نے اس حوالے سے فوکل پرسن کی تعیناتی کی بھی منظوری دی جو اپنے اپنے سرکلز میں خصوصی ڈیوٹیاں سرانجام دیں گے ۔چیف ایگزیکٹو کی ہدایت کے مطابق یکم محرم تا 10 محرم الحرام تک ایس ایز ، ایکسئینز اور ایس ڈی اوز سمیت تمام عملہ کسی بھی ہنگامی صورتحال سے فی الفور نمٹنے کے لیئے اپنے دفاتر میں موجود رہے گا ۔جبکہ فیلڈ سٹور مینجرز کو بھی ہر ڈویژن کو 4 اضافی ٹرانسفارمرز مہیا کرنے کی ہدایات جاری کر دی گئی ہیں ۔اس کے ساتھ ساتھ اضافی ٹرانسفارمرز ٹرالیاں بھی ایمرجینسی کے دوران بروقت دستیاب ہوں گی۔
چیف ایگزیکٹو کی ہدایت پر 7محرم سے نکلنے والے جلوسوں میں لیسکو کا عملہ بھی خصوصی طور پر حفاظتی نقطہ نظر کے تحت ساتھ ساتھ رہے گاتاکہ عَلم اور دیگر زیارات کی برآمدگی کے دوران بجلی کی تاروں کے سبب کہیں بھی مشکلات کا سامنا نہ کرنا پڑے جبکہ نثار حویلی جہاں سے ذوالجناح کا مرکزی جلوس نکلے گا وہاں جنریٹر کا بھی انتظام کیا جائے گا جبکہ اضافی سورس کے تحت جلوس کے احتتامی مقام پر بھی ایک جنریٹر کا انتظام کیا جائے گا جبکہ لیسکو کا عملہ ذوالجناح کے راستے پرلٹکنے والی بجلی کی تمام تاروں کو کلئیر کرے گا ۔
چیف ایگزیکٹو سید واجد علی کاظمی کا کہنا تھا کہ تمام افسران اور عملہ اپنی دستیابی کو یقینی بنائیں تاکہ ان مقدس ایام میں بجلی کے ہنگامی مسائل کو فی الفور حل کیا جا سکے اور عزاداری اور لاء اینڈ آرڈر کے کاموں میں خلل پیدا نہ ہو سکے۔ لیسکو کے معزز صارفین کسی بھی ہنگامی صورتحال میں اپنے متعلقہ علاقے کے کمپلینٹ سیل کے علاوہ ان نمبروں 0320-0520333 , 0320-0520888پر فوری رابطہ کر سکتے ہیں۔
