اسلام آباد ،اکتو بر11(ٹی این ایس): عوامی مسلم لیگ کے سربراہ شیخ رشید محمد نے کہاہے کہ پہلے حدیبیہ کیس کو چوروں کی ماں سمجھتا تھا لیکن ایل این جی کا معاہدہ سارے چوروں کی ماں ہے۔میڈیا سے گفتگو کرتے ہوئے شیخ رشید نے کہا کہ اسپیکر کو ایل این جی میں 200 ارب روپے کی کرپشن کا اعمال نامہ دے رہا ہوں، ایل این جی معاہدے کی کاپی حاصل کرنے کیلئے کوششیں کرکے تھک گیا تھا، اس ملک میں آپ کو یہ حق بھی حاصل نہیں کہ ایک معاہدے کی کاپی حاصل کرلیں ،ْاس سے زیادہ ذلت اور بے عزتی ممبران کی نہیں ہوسکتی۔
شیخ رشید نے کہا کہ ہم شہیدوں کے گھر جاتے ہیں تو وہ کہتے ہیں ہمارے بچے چوروں کیلئے جان دے رہے ہیں۔انہوں نے کہا کہ آئی ایم ایف نے اسحاق ڈار کو قبول کرنے سے انکار کردیا ،ْانہوں نے منی لانڈرنگ اور کرپشن میں ملوث شخص سے معاملات طے کرنے سے انکار کیا، ملک شدید معاشی بحران میں جانے والا ہے، وزیراعظم سے کہتا ہوں اسحاق ڈار کو دس دن کے اندر ہٹائیں۔عوامی مسلم لیگ کے سربراہ نے کہاکہ ملک میں خانہ جنگی ہوکر رہے گی ،ْایل این جی سارے چوروں کی ماں ہے، میں سمجھتا تھا کہ حدیبیہ کیس چوروں کی ماں ہے۔
شیخ رشید احمد نے کہا کہ ایک شخص کے لیے الیکشن اصلاحات کی گئیں اور سارا قانون بنایا گیا، ختم نبوت پر کہتے ہیں غلطی ہوگئی تاہم یہ مغرب کو خوش کرنے کے لیے منصوبہ بندی کے تحت کیا گیا۔انہوں نے کہا کہ سپریم کورٹ کا فیصلہ آگیا اور نااہلی بھی ہوگئی لیکن یہ لوگ ڈٹے ہوئے ہیں، اب ہمارے پاس سڑکوں پر آنے کے علاوہ کوئی راستہ نہیں۔
