آئین و قانون کے حوالے سے ختم نبوت کے معاملے پر اب کوئی شک و شبہ نہیں اور نہ ہی کسی قسم کا کوئی سقم باقی رہا ہے ٗعرفان صدیقی

اسلام آباد  نومبر 21(ٹی این ایس)وزیراعظم کے مشیر برائے قومی تاریخ و ادبی ورثہ عرفان صدیقی نے کہا ہے کہ آئین و قانون کے حوالے سے ختم نبوت کے معاملے پر اب کوئی شک و شبہ نہیں اور نہ ہی کسی قسم کا کوئی سقم باقی رہا ہے۔ ایک انٹرویومیں انہوں نے کہا کہ ہمیں امید ہے کہ پیر حسین الدین شاہ کی زیر نگرانی میں بننے والی کمیٹی دھرنا مظاہرین کو قائل کرنے کی پوری کوشش کرے گی۔

انہوں نے کہا کہ دھرنا مظاہرین کے ساتھ وفاقی وزیر داخلہ احسن اقبال اور وفاقی وزیر برائے مذہبی امور سردار محمد یوسف کی بھی ایک میٹنگ ہوئی ہے جس میں علماء کرام بھی موجود تھے اور یہ فیصلہ کیا گیا ہے کہ دھرنے والوں کے خلاف آپریشن ملتوی کر کے معاملے کو پرامن طریقے سے حل کیا جائے۔ مشیر وزیراعظم نے کہا کہ گزشتہ روز علماء کرام اور حکومتی نمائندوں نے اپنے اپنے خیالات کا اظہار کیا اور ایک کمیٹی قائم کرنے کا فیصلہ کیا ہے جو اس مسئلے کو حل کرے گی۔ انہوں نے دوٹوک الفاظ میں کہا کہ علمائے کرام نے وزیر قانون زاہد حامد کے استعفے کا مطالبہ نہیں کیا۔ عرفان صدیقی کا کہنا تھا کہ حکومت اس کمیٹی کے ساتھ مکمل تعاون کرے گی۔