عمان فروری 18(ٹی این ایس)اردن کی فوج نے شام کی سرحد کے ساتھ بچھی ہوئی تیل کی ایک غیر استعمال شدہ پائپ لائن کے ذریعے اسلحہ ، منشیات اور دہشت گرد اسمگل کرنے کی سازش ناکام بنا دی ۔غیرملکی خبررساں ادارے کے مطابق اردن کی مسلح افواج کی جنرل کمان کے ایک افسر نے اس سازش کو ناکام بنانے کی اطلاع دی ۔ انھوں نے بتایا کہ دہشت گردوں اور منشیات کے اسمگلروں کے ایک گروپ نے اردن اور شام کی سرحد پر واقع ایک مکان لے رکھا تھا اور اس کے نزدیک انھوں نے غیر مستعمل بین العرب (ٹرانس عربین ) پائپ لائن تک کئی سرنگیں کھود لی تھی۔ وہ اس کو ہتھیاروں اور منشیات کی اسمگلنگ اور دہشت گردی کے حملوں کے لیے استعمال کرنا چاہتے تھے۔اردنی حکام نے سرحد ی علاقے میں ان سرنگوں کو تباہ کرنے اور فوج کے انجنیئرنگ یونٹوں کو تیل کی اس پائپ لائن کو اکھاڑنے کا حکم دیا تاکہ مستقبل میں کوئی اور اسمگلر یا دہشت گرد اس کو مذموم تخریبی مقاصد کے لیے استعمال نہ کرسکیں ۔
