علاقے میں کام کرنیوالا واحد اسپتال ترک طیارے کی بمباری کا براہ راست نشانہ بنا،ترکی کی حملے کی تردید
انقرہ/دمشق مارچ 18(ٹی این ایس): شام میں کرد ملیشیا کے زیر قبضہ شمالی شہر عفرین پر ترک فوج کے ایک فضائی حملے میں دو حاملہ خواتین سمیت سولہ افراد ہلاک اور 60 زخمی ہوگئے ۔غیرملکی خبررسا ں ادارے کے مطابق گزشتہ روز ایک بیان میں کرد ہلال احمر کی میڈیکل سروس نے کہاکہ فضائی حملے میں ایک اسپتال کو نشانہ بنا یا گیا، شہر میں صرف یہی ایک اسپتال کام کررہا ہے۔برطانیہ میں قائم شامی رصدگاہ برائے انسانی حقوق نے اس حملے کی تصدیق کرتے ہوئے کہا کہ یہ اسپتال ترک طیارے کی بمباری کا براہ راست نشانہ بنا ۔رصدگاہ کے ڈائریکٹر رامی عبدالرحمان نے دو حاملہ خواتین سمیت سولہ شہریوں کی ہلاکت کی تصدیق کی اور کہا کہ اسپتال کے عملہ کا کوئی رکن فضائی حملے میں ہلاک نہیں ہوا ۔دوسری جانب ترکی نے شام کے علاقے عفرین کے ہسپتال کو نشانہ بنانے کی تردید کی اوراس بات پر زور دیا کہ اس نے گذشتہ دو ماہ سے جاری آپریشن میں عام شہریوں کو نقصان نہیں پہنچایا ۔ترکی کی فوج نے سنیچر کو عفرین کے ہسپتال کی فضائی تصاویر پیش کیں جو اس کے بقول یہ ثابت کرتی ہیں کہ یہ اطلاعات جھوٹی ہیں۔
