اسلام آباد، جون 23 (ٹی این ایس): تحریک انصاف نے ایڈن ہاؤسنگ سوسائٹی میں اربوں کے مبینہ فراڈ کو الیکشن میں کیش کرنے کے لئے سابق چیف جسٹس آف پاکستان افتخار چوہدری، ان کی صاحبزادی، داماد اور سمدھی کیخلاف کارروائی کا مطالبہ کردیا ہے۔
پی ٹی آئی کے ترجمان فواد چوہدری نے اس مقصد کے لئے چیئرمین نیب کو خط لکھا ہے جس میں کہا گیا کہ “ایڈن ہاؤسنگ” ملکی تاریخ کا ایک بڑا سکینڈل ہے، افتخار چوہدری، انکی بیٹی، داماد اور سمدھی نے مبینہ طور پر قومی خزانے کو اربوں کا نقصان پہنچایا، معتبر ترین شواہد اور عدالت عظمٰی کے واضح احکامات کے باوجود افتخار چوہدری اور دیگر کیخلاف کارروائی سے گریز پر تشویش ہے،
فواد چوہدری نے کہا کہ ایڈن ہاؤسنگ میں بیواؤں، یتیموں اور غریب ملازمین کی جمع پونجی پر ہاتھ صاف کئے گئے، افتخار چوہدری کیخلاف کارروائی کیلئے قوم کی نگاہیں قومی احتساب بیورو کی جانب اٹھ رہی ہیں، قوم جاننا چاہتی ہے کہ آئینی طور پر باختیار ادارے نے اب تک افتخار چوہدری، انکی صاحبزادی، داماد اور سمدھی کیخلاف کیا کارروائی کی،قومی احتساب بیورو کا کارروائی سے گریز چیئرمین اور ادارے کی ساکھ پر نہایت منفی اثرات مرتب کرے گا، آئین کی بالادستی اور قانون کے یکساں نفاذ کے علاوہ تکریم کا کوئی رستہ نہیں، فواد چوہدری
چیئرمین نیب فوری طور پر اس معاملے کا نوٹس لیں، اور ملکی تاریخ کے اس بڑے سکینڈل میں ملوث افراد کا انکی حیثیت کی بجائے جرم کی سنگینی کے اعتبار سے محاسبہ کیا جائے۔
