انتخابات میں جو ہتھکنڈے استعمال کئے جا رہے ہیں ان سے کئی سوالات نے جنم لیا ہے‘مصطفی نواز کھوکھر
لاہور26جولائی ( ٹی این ایس) پاکستان پیپلز پارٹی نے حلقہ این اے 246لیاری کا نتیجہ روکے رکھنے پر شدید احتجاج کرتے ہوئے کہا ہے کہ انتخابات میں جو ہتھکنڈے استعمال کئے جا رہے ہیں ان سے کئی سوالات نے جنم لیا ہے۔چیئرمین پیپلز پارٹی بلاول بھٹو زرداری کے ترجمان سینیٹر مصطفی نواز کھوکھر نے کہا کہ بائیس گھنٹوں سے زائد وقت گذر گیا اب تک لیاری سے بلاول بھٹو کے حلقے کے نتائج نہیں دیئے گئے، این اے دو 246 کے سو سے زائد پولنگ سٹیشنوں کے نتائج ہی غائب کر دیئے گئے ہیں،
ہمارے پولنگ ایجنٹس کو فارم پینتالیس ابھی تک نہیں دیا گیا، پولنگ ڈے پر بلاول بھٹو کے چیف پولنگ ایجنٹ یوسف بلوچ کو حراساں کیا گیا، یوسف بلوچ کے علاوہ ڈی آر او نے راشد ربانی اور نادیہ گبول کے ساتھ بھی ناروا سلوک اختیار کیا، نتائج نہ دینا، پولنگ ایجنٹس کے ساتھ بدتمیزیاں کس ضابطے اور قانون کے تحت کی جارہی ہیں۔ سینیٹر مصطفی نواز کھوکھر نے کہا کہ انتخابات میں جو ہتھکنڈے استعمال کئے جا رہے ہیں ان سے کئی سوالات نے جنم لیا ہے، حالات کا جائزہ لے رہے ہیں، نتائج کے بعد مشاورت کر کے لائحہ عمل دیں گے۔
