اسلام آباد اگست 31(ٹی این ایس):پاکستان تحریک انصاف کے رہنما شہریار خان آفریدی نے وزیرمملکت برائے داخلہ کے عہدے کا حلف اٹھا لیا۔
تفصیلات کے مطابق ایوان صدر میں پی ٹی آئی کے رہنما اور رکن قومی اسمبلی شہریارخان آفریدی نے وزیرمملکت برائے داخلہ کا حلف اٹھایا، صدرممنون حسین نے شہریار خان آفریدی سے حلف لیا۔انہوں نے سماجی رابطے کی ویب سائٹ ٹویٹرپراپنے پیغام میں کہا کہ اللہ تعالی نے مجھے یہ ذمہ داری دی ہے، اللہ میری مدد فرمائے اور مجھے طاقت دے کہ میں فرض کی ادائیگی احسن طریقے سے کرسکوں۔وفاقی کابینہ کی جانب سے دو روز قبل شہریارخان آفریدی کو وزیرمملکت برائے داخلہ بنانے کا فیصلہ کیا گیا تھا، وزیراعظم عمران خان نے منظوری دی تھی۔
یاد رہے کہ 27 اگست کو وزارت داخلہ میں اجلاس کی صدارت کے دوران وزیراعظم عمران خان کو ماتحت اداروں کے بارے میں بریفنگ دی گئی تھی۔وزیراعظم عمران خان نے اجلاس سے خطاب کرتے ہوئے کہا تھا کہ وزارت داخلہ ملک سے لوٹی گئی دولت کی واپسی کے لیے ہرممکن اقدامات کرے۔عمران خان کا کہنا تھا کہ ایف آئی اے اور نیب مل کرکام کریں، منظم جرائم اور کرپشن کے خاتمے کے لئے مربوط روابط قائم کیے جائیں.وزیراعظم کا کہنا تھا کہ بیرون ملک پاکستانی ملک کا اثاثہ ہیں،ان کو ملک میں سرمایہ کاری کے مواقع فراہم کیے جائیں گے۔عمران خان کا کہنا تھا کہ وزارت داخلہ اور اس کے ذیلی ادارے شہریوں کے تحفظ کے لیے ضروری اقدامات اٹھائیں۔
