اسلام آباد ستمبر 7(ٹی این ایس): وزیر برائے انسانی حقوق ڈاکٹر شیریں مزاری نے سوشل میڈیا پر وائرل ہونے والی ویڈیو کا نوٹس لے لیا جس میں ایک خاتون کم عمر ملازمہ پر بہیمانہ تشدد کر رہی ہیں۔یہ ویڈیو گزشتہ روز سے سوشل میڈیا پر وائرل ہونی شروع ہوئی جس میں ایک خاتون ایک کم عمر ملازمہ کو نہایت سنگدلی سے تشدد کا نشانہ بنا رہی ہیں۔ویڈیو میں خاتون چائے کی پتی کے زیادہ استعمال پر برہم نظر آرہی ہیں اور اس بات پر کم عمر ملازمہ کے بال کھینچ رہی ہیں اور چہرے کو تھپڑوں کا نشانہ بنا رہی ہیں۔ملازمہ اس ظلم پر نہایت ہراساں نظر آرہی ہے جبکہ رو بھی رہی ہے۔وزیر برائے انسانی حقوق ڈاکٹر شیریں مزاری نے ویڈیو کا نوٹس لیتے ہوئے سماجی رابطے کی ویب سایٹ ٹویٹر پر کہا کہ کوئی ان خاتون کا پتہ جانتا ہے تو مدد کرے تاکہ ان کے خلاف کارروائی کی جاسکے۔ان کے اس ٹویٹ پر لوگوں نے حوصلہ افزائی کرتے ہوئے کہا کہ ملازمین کو انسان نہ سمجھنے والے ایسے افراد کو سخت سزا دی جائے تاکہ ان میں انسانیت کا جذبہ پیدا ہو۔
