پولیس پیپلزپارٹی کے سابق سینیٹر فیصل رضا عابدی کو گرفتار کرنے ان کی رہائش گاہ پہنچ گئی
اسلام آباد ستمبر 30 (ٹی این ایس): پولیس پیپلزپارٹی کے سابق سینیٹر فیصل رضا عابدی کو گرفتار کرنے کے لیے ان کی رہائش گاہ پہنچ گئی۔میڈیا رپورٹس کے مطابق پولیس فیصل رضا عابدی کو گرفتار کرنے کے لیے ان کی رہائش گاہ پہنچی۔تاہم فیصل رضا عابدی نے گرفتاری دینے سے انکار کر دیا۔فیصل رضا عابدی کا کہنا ہے کہ میں نے جو بھی کہا اس پر قائم ہوں۔واضح رہے دو روز قبل اسلام آباد پولیس کو سابق سینیٹر فیصل رضا عابدی کو گرفتار کرنے کی اجازت مل گئی تھی۔
پیپلزپارٹی کے سابق سینیٹر کے خلاف اسلام آباد کے تھانہ سیکرٹریٹ میں پی آر او سپریم کورٹ کی مدعیت میں مقدمہ درج کیا گیا تھا۔ مقدمے میں انسداد دہشت گردی اور دیگر دفعات شامل ہیں۔ فیصل رضا عابدی کے خلاف مقدمہ زیر دفعہ 228،500، 505 دو، 506 اور 34 کے تحت درج کیا گیا۔ جبکہ مقدمے میں دہشت گردی کی دفعہ7 اے ٹی اے بھی لگائی گئی۔ فیصل رضا عابدی کے خلاف سائبر کرائم ونگ میں بھی مقدمہ درج کیا گیا ۔
ایف آئی آر کے مطابق فیصل رضا عابدی نے چیف جسٹس کے خلاف نازیبا کلمات ادا کئے۔ پروگرام آئن ایئر جانے کے بعد فیصل رضا عابدی کی ویڈیو سوشل میڈیا پروائرل ہوئی، جس میں انہوں نے چیف جسٹس ثاقب نثار کو تضحیک کا نشانہ بنایا اور دھمکی آمیز الفاظ استعمال کیے۔ پولیس کے مطابق متعلقہ خاتون اینکر کے خلاف بھی کارروائی کی جائے گی۔ بعد ازاں اسلام آباد پولیس نے فیصل رضا عابدی کیخلاف مزید کاروائی کیلئے وزارت داخلہ سے رابطہ کیا تھا۔ وزارت داخلہ کی مداخلت کے باعث اسلام آباد پولیس کو کراچی میں موجود فیصل رضا عابدی کی گرفتاری کی اجازت مل گئی۔آج جب پولیس فیصل رضا عابدی کو گرفتار کرنے ان کی رہائش گاہ پہنچی تو انہوں نے گرفتاری دینے سے انکار کر دیا۔
