آپریشن طاقتورمافیا اوربڑےمگرمچھوں سے شروع کیا جائیگا، قانون کے تحت سخت کارروائی ہوگی،آپریشن کیلئے انتظامات مکمل کیے جائیں۔وزیراعلیٰ عثمان بزدار،علیم خان کی زیرصدارت اجلاس میں بڑا فیصلہ
لاہور ستمبر 30 (ٹی این ایس): وزیراعلیٰ پنجاب سردار عثمان بزدارکی زیرصدارت آج وزیراعلیٰ آفس میں اعلی سطح کا اجلاس کا منعقد ہوا، جس میں قبضہ مافیا اورتجاوزات کے خلاف گرینڈ آپریشن کی منظوری دی گئی۔ وزیراعلیٰ سردارعثمان بزدار نے اجلاس سے خطاب کرتے ہوئے کہا کہ قبضہ گروپوں اورتجاوزات کے خلاف آپریشن طاقتور مافیاسے شروع کیا جائے گا اورآپریشن بلاامتیاز اوربلا رعایت ہوگا۔
زمینوں پر قبضے اورتجاوزات کرنیوالوں کے خلاف قانون کے تحت سخت کارروائی ہوگی۔انہوں نے کہا کہ وزیراعظم عمران خان کی ہدایت پر قبضہ مافیااورتجاوزات کرنیوالوں کے خلاف شروع کی جانے والی مہم ہر صورت کامیاب ہونی چاہیے۔ متعلقہ محکمے اورادارے مربوط کوآرڈینیشن کے تحت مہم کا آغاز کریں۔ آپریشن کیلئے تمام تیاریاں اورانتظامات مکمل کیے جائیں۔
وزیراعلیٰ نے اپیل کی کہ عوام اپنے اردگردعلاقوں میں موجود قبضہ مافیاکی نشاندہی کریں، ہم کارروائی کریں گے ۔سینئر صوبائی و زیر عبدالعلیم خان نے اجلاس سے خطاب کرتے ہوئے کہا کہ آپریشن کو کامیاب بنانے کیلئے تمام ادارے آپس میں قریبی رابطہ رکھیں۔ سب سے پہلے بڑے مگر مچھوں پر ہاتھ ڈالا جائے۔ انہوں نے کہا کہ آپریشن کے دوران واگزار کرائی گئی اراضی کو زیر استعمال لانے کیلئے پلان مرتب کیا جائے۔
صوبائی وزیر ہاوٴسنگ محمود الرشیدنے اجلاس سے خطاب کرتے ہوئے کہا کہ قبضہ مافیا اورتجاوزات کے خلاف آپریشن کے حوالے سے عوام میں بھرپور آگاہی مہم چلائی جائے کیونکہ اس ناسور کا خاتمہ عوام کے اپنے مفاد میں ہے۔ انہوں نے کہا کہ کسی بھی قسم کے دباوٴکو بالائے طاق رکھ کرآپریشن کرنا ہوگا۔ وزیراعلیٰ کو قبضہ مافیا اورتجاوزات کے خلاف شروع کی جانے والی مہم کے بارے میں بریفنگ دی گئی۔ سینئر صوبائی وزیر بلدیات عبدالعلیم خان، صوبائی وزیر ہاوٴسنگ محمود الرشید ،چیف سیکرٹری ،متعلقہ محکموں کے سیکرٹریز اور اعلی حکام نے اجلاس میں شرکت کی۔
