اسلام آباد جنوری 24 (ٹی این ایس): سینیٹ قائمہ کمیٹی برائے داخلہ کا سینیٹر رحمان ملک کی زیر صدارت سینیٹ سیکرٹریٹ میں اِن کیمرہ اجلاس، یہ اجلاس سانحہ ساہیوال پر بلایا گیا تھا۔ اجلاس میں سینیٹر اعظم سواتی، سینیٹر عتیق شیخ، سینیٹر اسد جونیجو، سینیٹر شفیق تریناور سینیٹر وسیم شہزاد نے شرکت کی۔ اجلاس میں سانحہ ساہیوال اور اس پر اب تک ہونے والی تفتیش کے مختلف پہلوؤں کا جائزہ لیا گیا۔
سینیٹر رحمان ملک کا کہنا تھا کہ سانحہ ساہیوال انتہائی دردناک و افسوسناک ہے، حقائق تک پہنچنا ضروری ہے۔ سانحہ ساہیوال کی ہر پہلو کا جائزہ لیں گے تاکہ مستقبل میں ایسے واقعات رونما نہ ہو۔ کمیٹی کا سانحہ ساہیوال پر وہاں کے ایم این اے، ایم پی اے و کونسلرز کو اجلاس میں بلانے کا فیصلہ کیا گیا اور مقتولین کے ورثاء کو بھی کمیٹی میں بلانے کا فیصلہ کیا گیا۔
کمیٹی کے اراکین نے اب تک کاروائی پر چئیرمین سینیٹر رحمان ملک کے کاوشوں کو سراہا اور اعتماد کا اظہار کیا۔ اجلاس کل دوبارہ بروز جمعہ دن ڈھائی بجے پارلیمنٹ ہاوس میں ہوگا۔
