اسلام آباد مئی 20 (ٹی این ایس): سپریم کورٹ آف پاکستان نے پی آئی اے ایئرہوسٹسز جعلی ڈگری کیس میں پی آئی اے کے 8 ملازمین کی نظر ثانی و متفرق درخواستیں خارج کردیں۔ پیر کوجسٹس عظمت سعید کی سربراہی میں تین رکنی بینچ نے کیس کی سماعت کی۔جسٹس عظمت سعید شیخ نے کہاکہ عدالت اپنے فیصلے پر کیا نظر ثانی کرے، کیوں نہ فیصلے میں نظر ثانی کر کے جعلی ڈگری والوں کے خلاف پرچہ درج کرنے کا حکم دیں۔
جسٹس عظمت سعید شیخ نے کہاکہ سپریم کورٹ کا مذاق بنایا ہوا ہے، عدالت کا ادب و احترام رہا ہی نہیں۔ وکیل نے کہاکہ عدالت نے جو حکم دیا اس کی غلط تشریح کی جارہی ہے، متعلقہ عدالتیں سپریم کورٹ کے فیصلے کی وجہ سے ہماری بات سننے کو تیار نہیں۔ عدالت نے کہاکہ متعلقہ عدالتیں قانون کے مطابق پی آئے اے ملازمین کی درخواستوں پر فیصلہ کرے۔یاد رہے کہ سپریم کورٹ میں شازیہ آفریدی، ثمینہ قریشی، عبد الروف بیگ، نظر خان، کامران خان، طاہرہ سلطانہ، ثناء گل، شوکیب شوکت نے درخواستیں دائر کی تھیں۔
