اسلام آباد اکتوبر 01 (ٹی این ایس): وزیراعظم عمران خان نے سرکاری اداروں میں کاموں میں تاخیر ہونے کا نوٹس لے لیا۔ تفصیلات کے مطابق وزیر اعظم عمران خان نے سرکاری اداروں کی جانب سے شہریوں کو خدمات کی فراہمی میں تاخیر کا نوٹس لے لیا۔ اس حوالے سے وزیر اعظم آفس کی جانب سے جاری بیان میں کہا گیا کہ شہریوں کی بے شمار درخواستیں تعطل کا شکار ہیں۔ شہریوں کی لائسنس، این او سی اور ڈومیسائل کے حصول کی شکایات ہیں۔
وزیر اعظم عمران خان نے وزارتوں اور صوبوں کو ہدایت کر دی کہ شہریوں کی درخواستیں 4 ہفتوں میں نمٹائی جائیں۔ وزیراعظم عمران خان نے ہدایت کی کہ سرکاری ادارے شہریوں کی درخواستوں اور پٹیشنز پر عملدر آمد یقینی بنائیں۔ وزیر اعظم عمران خان کی جانب سے سخت ہدایات کی گئیں کہ سرکاری ادارے 4 ہفتے بعد رپورٹ وزیر اعظم اور وزیر اعلیٰ کو بھجوائیں، رپورٹ کے ذریعے بتایا جائے کہ شہریوں کی کتنی درخواستوں پر کتنا کام ہوا۔
وزیر اعظم کی جانب سے مزید کہا گیا کہ شہریوں کا سرکاری اداروں پر اعتماد بحال ہونا چاہیئے، ادارے ویب سائٹ یا نوٹس بورڈ پر سروس ڈیلیوری ٹائم لائن بتائیں۔ ٹائم لائن سے شہریوں کو معلوم ہوگا درخواست پر کتنا کام ہوچکا ہے۔ وزرائے اعلیٰ اور چیف سیکریٹریز کو معاملے پر وزیر اعظم عمران خان کو بر وقت آگاہ رکھنے کی ہدایت بھی کی گئی۔ اس حوالے سے بات کرتے ہوئے وفاقی وزیر مواصلات مراد سعید نے کہا کہ شہریوں کو شناختی کارڈ اور ڈومیسائل حاصل کرنے میں مشکلات ہوتی ہیں۔
جلد شناختی کارڈ اور ڈومیسائل کا طریقہ کار بہت آسان کر دیا جائے گا۔ وزیر اعظم عمران خان نے بھی اس معاملے پر احکامات جاری کر دیے ہیں۔ یاد رہے کہ وزیراعظم عمران خان نے شہریوں کو سہولیات کی فراہمی کے لیے اس سے قبل بھی متعلقہ محکموں کو ہدایات جاری کی تھیں۔ جبکہ وزیراعظم عمران خان نے سیٹیزن پورٹل بھی متعارف کروایا تھا جہاں شہری براہ راست وزیراعظم کو اپنی شکایات بھجواتے ہیں۔
