لاہور اکتوبر 29 (ٹی این ایس): صوبائی وزیر صحت ڈاکٹر یاسمین راشدکی زیرصدارت راولپنڈی میڈیکل یونیورسٹی کے سنڈیکیٹ کا چھٹا اجلاس منعقدہوا۔اس موقع پر وائس چانسلر پروفیسر ڈاکٹر عمر اور سنڈیکیٹ کے دیگر ممبران نے شرکت کی۔رجسٹرار راولپنڈی میڈیکل یونیورسٹی نے سنڈیکیٹ اجلاس کے حاضرین کو ایجنڈا بارے آگاہ کیا۔اجلاس کے دوران وزیر صحت نے یونیورسٹی میںٹریننگ پروگرامز، کورسز اور مختلف ایس او پیز و ٹی او آرز کی منظوری دی۔
سنڈیکیٹ اجلاس میں راولپنڈی میڈیکل یونیورسٹی کے دوسرے طبی تعلیمی اداروں کے ساتھ تعلیمی معاہدوں اور سپیشل ڈرائنگ اکائونٹ کھولنے کی منظوری دی گئی۔راولپنڈی میڈیکل یونیورسٹی سے ملحقہ تعلیمی اداروں میں میڈیکل اور لیبارٹری کے سامان کی خریداری کی بھی منظوری دے دی گئی۔صوبائی وزیرصحت نے سنڈیکیٹ اجلاس میں ہیماٹالوجی اینالائزر ایکویپمنٹ اور کارڈیک مانیٹرایکویپمنٹ کی خریداری کی منظوری دی ۔
سنڈیکیٹ اجلاس میں ہولی فیملی ہسپتال کی کارپارکنگ کے نئے کنٹریکٹ کی بھی منظوری دی گئی۔وزیر صحت پنجاب ڈاکٹر یاسمین راشد نے وائس چانسلر راولپنڈی میڈیکل یونیورسٹی کو ترقیاتی منصوبے جلد مکمل کرنے کی بھی ہدایت کی۔وزیر صحت پنجاب ڈاکٹر یاسمین راشد نے کہاکہ ترقیاتی منصوبوں میں شفافیت اور معیار پر کسی قسم کا سمجھوتہ نہ کیا جائے۔وزیراعلیٰ پنجاب سردار عثمان بزدار نے محکمہ صحت پنجاب کو سب سے زیادہ بجٹ دے کر صحت کے شعبہ کو اولین ترجیح دی ہے۔
