کویت نومبر 11 (ٹی این ایس): زبانوں کی ترویج و ترقی میں شعری و ادبی محافل کے انعقاد نے ہر دور میں نمایاں کردار ادا کیا ہے۔ ایسی تقاریب کے انعقاد سے نہ صرف زبان وادب کے فروغ میں خاطر خواہ اضافہ ہوتا ہے بلکہ ان محافل میں ہونے والی پر مغز گفتگو اور شعراء کرام کے کلام کے ذریعے انسان کے ہر قسم کے احساسات، جذبات، تخیلات اور تصورات کے اظہار کے علاوہ انسان کے معاشی، معاشرتی، اور سماجی مسائل کی نشاندہی کرنے کے ساتھ ساتھ اُن کے حل کی طرف بھی ترغیب دی جاتی ہے اور ایسی محافل کے انعقاد کرنے والوں نے ہر دور میں اپنے خون سے زبان و ادب کی آبیاری کی ہے۔
ایسی ہی ایک شعری نشست کا اہتمام کویت پاکستان فرینڈشپ ایسوسی ایشن کے صدر رانا اعجاز سہیل کے دولت کدے پر کیا گیا، جس میں پاک و ہند کے نامور شعراء کرام کے علاوہ کویت میں مقیم پاکستانی کمیونٹی کی قابلِ قدر علمی و ادبی، کاروباری اور سماجی شخصیات نے شرکت کی۔ شعرا ء کرام میں ڈاکٹر عامر قدوائی، بدر سیماب، عماد بخاری، سید صداقت علی ترمذی، ذوالفقار ارشد ذکی، کمال انصاری اور محمد ریاض شامل تھے۔
نشست کی نظامت نوجوان شاعر اور جنرل سیکرٹری انجمن اربابِ فکروفن کویت سید صداقت علی ترمذی نے کی جبکہ صدارت انجمن اربابِ فکروفن کویت کے صدر بدر سیماب کے حصہ میں آئی۔
پاکستان سے کویت تشریف لانے والی نامور کاروباری وسماجی شخصیت حاجی محمد نواز بزم کے مہمانِ خصوصی تھے۔ جبکہ کویت میں مقیم سائنسدان ڈاکٹر شبیر شاہد اور ڈاکٹر عامر قدوائی مہمانانِ اعزاز تھے۔
صدر کویت پاکستان فرینڈ شپ ایسوسی کویت رانا اعجاز سہیل نے افتتاحیہ کلمات میں تمام شعراء کرام اور معزز مہمانوں کو خوش آمدید کہا اور ان کا شکریہ ادا کیا اور عبد اللہ خان کو تلاوت قرآن پاک کے لئے اور شعری نشست کے باقاعدہ آغاز کے لئے ناظم تقریب سید صداقت علی ترمذی کو مدعو کیا۔
ناظمِ تقریب نے سب سے پہلے تمام شعرا ء کرام اور معزز مہمانوں کی جانب سے میزبانِ محفل کا تہہِ دل سے شکریہ ادا کیا اور اُن کی ادبی و سماجی خدمات کو خراجِ تحسین پیش کیا۔
ناظم تقریب نے اردو ادب کے نامور شعراء کرام کے کلام سے بھی محفل کو معطر کئے رکھا اور کویت میں مقیم مقامی شعرا میں سے نئے ابھرتے ہوئے شاعر محمد ریاض سے شعری نشست کا آغاز کیا گیا۔ جن کے کلام کو شرکائے محفل نے خوب پسند کیا اور داد و تحسین سے نوازا۔ اُن کے بعد ناظمِ تقریب سید صداقت علی ترمذی، ذوالفقار ارشد ذکی، کمال انصاری، عماد بخاری، ڈاکٹر عامر قدوائی اور بدر سیماب سمیت تمام شعرا نے اپنا بہترین کلام پیش کیا اور حاضرینِ محفل سے خوب داد وصول کی۔
خطبہء صدارت میں بدر سیماب نے میزبان تقریب رانا اعجاز سہیل اور تمام مہمانوں کا شکریہ ادا کرتے ہوئے اس طرح کی ادبی سرگرمیوں کو جاری و ساری رکھنے کی درخواست کی اور اسے اردو ادب کی ترویج کا حصہ قرار دیا۔ ڈاکٹر عامر قدوائی نے تمام شعراء کرام کے کلام کو سراہا اور اُن کو خراجِ تحسین پیش کیا۔ مہمانِ اعزازی ڈاکٹر شبیر شاہد نے اپنے خیالات کا اظہار کرتے ہوئے کہا کہ یہ اُن کی زندگی میں کسی بھی مشاعرہ میں پہلی شرکت ہے لیکن درحقیقت وہ آج کی اس شعری نشست سے بہت محظوظ ہوئے ہیں جس میں شعراء کرام کے کلام میں زندگی کا ہر رنگ جھلکتا ہوا دکھائی دیا ہے۔
انہوں نے مستقبل میں بھی ایسی تقریبات میں شرکت کرنے کی خواہش کا اظہار کیا اور میزبانِ محفل کا شکریہ ادا کیا۔ حاجی محمد نواز جو کہ تقریب کے مہمانِ خصوصی تھے انہوں نے اپنے خیالات کا اظہار کرتے ہوئے کہا کہ وہ پچھلے 21 دنوں سے کویت میں موجود ہیں اور روزانہ ہی کسی نہ کسی محفل میں بطور مہمان شرکت کر رہے ہیں لیکن آج کی تقریب اُن تمام محافل میں سرِ فہرست ہے جس کو ہمیشہ یاد رکھا جائے گا۔
انہوں نے رانا اعجاز سہیل کی دعوت کا شکریہ ادا کیا۔ میزبانِ تقریب کی فرمائش پر مہمانِ خصوصی حاجی محمد نواز سے میاں محمد بخشؒ کا کلام بھی سنا گیا۔تقریب کے اختتام پررانا آفتاب احمد نے کویت میں مقیم شاعر ڈاکٹر فیاض احمد شاہین کا پانچواں مجموعہء کلام (سنا ہے لوگ کہتے ہیں) مہمانِ خصوصی حاجی محمد نوازاور مہمانِ اعزازی ڈاکٹر عامر قدوائی کی خدمت میں پیش کیا۔
پروگرام کے آغاز سے قبل تمام مہمانوں کے لئے پرتکلف عشائیے کا بھی اہتمام کیا گیا تھا۔
شعرا کرام کا نمونہ کلام
نیند روٹھے ہوئے تو اِک زمانہ ہو گیا
ہاں مگر ہم لیٹ جاتے ہیں ارادہ اوڑھ کر
بہت ممکن ہے کام آئیں نئی دنیا بسانے میں
میں اپنے خواب کے پیکر تمہیں ارسال کرتا ہوں
ڈاکٹر عامرؔ قدوائی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تشنہ کام کا مطلب سمجھو
خالی جام کا مطلب سمجھو
اندھیروں سے میں نہیں ڈرتا
میرے نام کا مطلب سمجھو
بدر سیمابؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شکر ہے تیرا اثر ختم ہوا
آ گئی موت سفر ختم ہوا
تیرے جانے سے اے جانے والے
مری ہستی کا نگر ختم ہوا
عمادؔ بخاری
۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بولنا جرم تو خاموشی کبھی لے ڈوبی
ہم کو ہر عہد میں حق بات کہی لے ڈوبی
جیسے لے ڈوبے کوئی شام کسی سورج کو
مجھ کو اِک شوخ نظر پیار بھری لے ڈوبی
ر ت جگے ہجر میں برسوں کے ہوئے غارت اور
خوابِ غفلت کی فقط ایک گھڑی لے ڈوبی
روک لیتا تُو اگر چاک تو میں بچ جاتا
کوزہ گر مجھ کو تری کوزہ گری لے ڈوبی
حسن اور پیار کے دھوکے میں نہیں آتے تھے
عقل والوں کو بھی اِک سبز پری لے ڈوبی
سید صداقتؔ علی ترمذی
۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حسابِ دل میں جو الفت کے گوشوارے ہیں
قسم خدا کی وہ جتنے بھی ہیں تمہارے ہیں
کئی برس،،، کئی صدیاں اسیر ہیں ان میں
یہ چند پل جو تری یاد میں گزارے ہیں
ذوالفقار ارشد ذکیؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب ہم نے اپنے آپ کو تبدیل کر لیا
موسم کے ساتھ خواب ہمارے بدل گئے
چراغوں میں بھی دھر آئی سیاست
اندھیرا اور گہرا ہو رہا ہے
کمالؔ انصاری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تم نے تو بس خواب سہانے دیکھے تھے
میں نے تیرے سنگ زمانے دیکھے تھے
قمری کو کب شوق تھا جال میں آنے کا
اُس نے تو بس بکھرے دانے دیکھے تھے
محمد ریاضؔ
