اسلام آباد 09 مارچ 2021 (ٹی این ایس): مسلم لیگ ن کی نائب صدر مریم نواز کے شوہر کیپٹن صفدر نے آمدن سے زائد اثاثہ جات کیس نیب طلبی کا نوٹس ملنے کی تصدیق کردی ، کیپٹن (ر)صفدر کل نیب آفس میں پیش ہوں گے۔
کیپٹن (ر)صفدر کی آمدن سے زائد اثاثہ جات کیس میں طلبی کے معاملے پر لیگی ذرائع کا کہنا ہے کہ کیپٹن (ر)صفدر کل نیب آفس میں پیش ہوں گے ، انھوں نے نیب طلبی کانوٹس ملنے کی تصدیق کردی ہے۔
نیب نے محمد صفدر کو 10 مارچ صبح 11 بجے طلب کررکھا ہے اور سندر انڈسٹریل اسٹیٹ کےقریب کیپٹن صفدر کے نام فلور مل کی تفصیلات طلب کی۔
نوٹس میں کہا گیا ہے کہ مریم نواز کے نام موضع مال پر 337 کنال، 12 مرلہ اراضی کی تفصیل دی جائے جبکہ موضع بدوکی میں 62 کنال، 2 مرلہ اراضی کی تفصیل فراہم کرنے کی ہدایت کی ہے۔
نیب کا کہنا تھا کہ موضع اسیل لکھووال میں 14 کنال، 1 مرلہ اراضی ، رائیونڈ میں 200 کنال اراضی کی تفصیلات دی جائیں جبکہ کیپٹن صفدر کے نام موضع بدوکی میں 20 کنال اراضی کی تفصیلات بھی طلب کی ہے۔
نوٹس میں کیپٹن صفدر کے نام موضع لکھووال، لاہورمیں 30 تا40 کنال اراضی کی تفصیلات طلب کرتے ہوئے کہا ہے کہ کیپٹن (ر)صفدرتحصیل رائیونڈ میں 42 کنال اراضی کی تفصیلات ساتھ لائیں۔
نیب کی جانب سے مریم نواز کے نام خریدشدہ 109 ایکڑ اراضی اور سقا ایگری کلچر فارم اینڈ جیو اسٹیٹ فارم ہاؤس کی تفصیلات بھی طلب کی ہے۔
