اسلام آباد 06 اپریل 2021 (ٹی این ایس): وفاقی وزیر ریلوے اعظم خان سواتی نے کہا ہے کہ ریلوے کو کمرشل بنیادوں پر چلا رہے ہیں تاکہ ریلوے کو منافع بخش بنایا جاسکے، ریلوے کی ایک انچ زمین بھی فروخت نہیں ہوگی، اسے کمرشل بنیادوں پر استعمال کیا جائے گا، سرکاری زمینوں کی بندر بانٹ نہیں ہوگی، کالونیوں میں ہائوسنگ سکمیں بنائی جائیں گی، فریٹ ٹرین سروس ریلوے کے نظام میں ریڑھ کی ہڈی کی حیثیت رکھتی ہے، ریلوے ملازمین کو ایمانداری اور ذمہ داری کا مظاہرہ کرنا ہوگا۔
ان خیالات کا اظہار انہوں نے سکھرمیں چیمبرآف کامرس سے گفتگو اور ڈی ایس ریلوے آفس میں افسران کے اجلاس کی صدارت کرتے ہوئے کیا۔وفاقی وزیر ریلوے اعظم خان سواتی سکھرکے دو روزہ دورے پر یہاں پہنچے۔ انہوں نے ڈویژنل آفس سکھر میں ریلوے افسران کے ساتھ میٹنگ کی۔اجلاس میں ریلوے کی ترقی اور فریٹ ٹرین سروس سمیت آمدنی میں اضافہ کیلئے مختلف تجاویز پر غور کیا گیا۔ اس موقع پر وفاقی وزیر اعظم خان سواتی نے گفتگو کرتے ہوئے کہا کہ فریٹ سروس ریلوے کے نظام میں ریڑھ کی ہڈی کی حیثیت رکھتی ہے۔ ریلوے ملازمین کو ایمانداری اور ذمہ داری کا مظاہرہ کرنا ہوگا ۔اس موقع پر ڈویژنل سپرنٹینڈنٹ ریلوے سکھر طارق لطیف نے سکھر ڈویژن میں ریلوے کی ترقی ، آمدن بڑھانے کے حوالے سے مختلف تجاویز پیش کیں۔سکھرکے شہریوں کودرپیش مسائل اور سفری سہولیات کے حوالے سے بھی مختلف تجاویز کا جائزہ لیا گیا
۔وفاقی وزیر ریلوے اعظم خان سواتی نے ریلوے افسران کے ساتھ اجلاس کے بعد سکھر چیمبر آف کامرس کے وفد سے ملاقات کی ۔اس موقع پر گفتگوکرتے ہوئے وفاقی وزیر نے کہا کہ ہم ریلوے کو کمرشل بنیادوں پر چلا رہے ہیں تاکہ ریلوے کو ایک منافع بخش ادارہ بنایا جاسکے۔ ریلوے کی ایک انچ زمین بھی فروخت نہیں ہوگی تاہم اسے کمرشل بنادوں پر استعمال کیا جائے گا۔ماضی کی طرح سرکاری زمینوں کی بندر بانٹ نہیں کی جائے گی۔انہوں نے کہا کہ ریلوے کی رہائشی کالونیوں میں ہائوسنگ اسکمیں بنائی جائیں گی جس سے عوام اور ملازمین کو اعلی رہائشی سہولیات میسر آئیں گی۔ اس سلسلہ میں چائینز کمپنی سے بات چیت جاری ہے، چند روز میں پانچ چھ منزلہ عمارتیں بنانے کے حوالے سے معاملہ طئے ہوجائے گا۔
ملاقات کے دوران چیمبرآف کامرس کے صدر محمد دین نے کہا کہ سکھر کے تاجر ریلوے کے اسکول، ہسپتال اور دیگر املاک لینے میں دلچسپی رکھتی ہیں،محکمہ اس حوالے سے جلد پالیسی واضع کرے ۔ انہوں نے مطالبہ کیا کہ سکھر سے مال بردار ریل گاڑیوں اور مسافر ٹرینوں کی خصوصی کوچز فراہم کی جائیں۔وفاقی وزیرنے وفد کو یقین دہانی کرائی کہ سکھر کے لوگوں کو تمام مناسب سفری سہولیات فراہم کی جائیں گی،سکھر میں ہائی ریز بلڈنگز کی تعمیرات کے حوالے سے جلد سروے کیا جائے گا ۔ وزیراعظم عمران خان کی قیادت میں ملک ترقی کی جانب گامزن ہے۔بہت جلد آپ کو تبدیلی نظرآئیگی۔
