اسلام آباد 07 اکتوبر 2021 (ٹی این ایس): کراچی کے علاقے کورنگی بلال کالونی میں آج صبح خواجہ سرا پر ایک شخص نے تیزاب پھینکا، جس میں وہ 60 فیصد تک جھلس گیا تھا۔
خواجہ سرا کو تشویشناک حالت میں سول اسپتال کے برنس وارڈ منتقل کیا گیا، جہاں ڈاکٹرز نے اُس کے علاج کی بھرپور کوشش کی مگر جانبر نہ ہوسکا۔
تیزاب گردی کا نشانہ بننے والے خواجہ سرا کی شناخت صائمہ کے نام سے ہوئی، جس کا جسم 60 فیصد سے زائد جھلس چکا ہے۔
خواجہ سرا کے ساتھیوں نے بتایا کہ تیزاب پھینکنے والا شخص واردات کے فورا بعد فرار ہوگیا تھا۔ پولیس نے واقعے کا مقدمہ درج کر کے تحقیقات شروع کردی ہیں۔
اب سے کچھ دیر قبل تک خواجہ سرا کی لاش اسپتال میں موجود تھی۔ مقتول کے ساتھیوں نے بتایا کہ ضابطے کی کارروائی کاغذات کی وجہ سے مکمل نہیں ہوسکی، جیسے ہی جسد خاکی ہمیں موصول ہوگا آخری رسومات ادا کردی جائیں گی۔
یاد رہے کہ 12 ستمبر کو کراچی کے علاقے بلدیہ ٹاؤن سعید آباد میں ٹک ٹاک ویڈیوز بنانے پر تیزاب گردی کا شکار بننے والی خاتون اسپتال میں دم توڑ گئیں تھیں۔ علاوہ ازیں چوبیس ستمبر کو کراچی کے علاقے گلستان جوہر میں ملزم شوہر نے خلع مانگنے پر شوہر نے اپنے دو ساتھیوں کے ساتھ خاتون پر حملہ کیا اور اس پر تیزاب پھینک کر فرار ہوگیا تھا۔
