اسلام آباد 29 نومبر 2021 (ٹی این ایس): کراچی ،کوئٹہ : سندھ اور بلوچستان میں گیس بحران کے باعث سی این جی اسٹیشنز ڈھائی ماہ کیلئے بند کرنے کا اعلان کردیا گیا۔موسم سرما میں گھریلو صارفین کی اضافی طلب کو پورا کرنے کیلئے سی این جی سیکٹر کو گیس کی سپلائی معطل کی جارہی ہے۔تفصیلات کے مطابق سندھ اور بلوچستان میں گیس کے بحران کے پیش نظر سوئی سدرن گیس کمپنی(ایس ایس جی سی)نے دونوں صوبوں میں قائم تمام سی این جی اسٹیشنزڈھائی ماہ کیلئے بندکرنے کااعلان کیاہے جس کے تحت فلنگ اسٹیشنزیکم دسمبرسے15فروری 2022تک بندرہیں گے۔سوئی سدرن نے کہا کہ گھریلو صارفین کی ضروریات پوری کرنے کیلئے یہ فیصلہ کیا گیا ہے، لوڈ مینجمنٹ کے تحت گھریلو صارفین کی ضرورت پوری کرنے کیلئے سی این جی سیکٹر کو گیس کی فراہمی بند کی جائے گی ، طلب و رسد کا فرق بڑھ جانے سے یہ فیصلہ کیا گیا تاہم زیرو ریٹڈ صنعتیں بشمول کیپٹو پاور پلانٹس کو گیس کی سپلائی بحال ہے۔
