آئی جی پنجاب نے شہدائے پولیس کے بچوں سے نوتعمیر شدہ یادگار شہداء کا افتتاح کروایا۔
شہدائے پولیس ہمارا فخر ہیں جن کی لازوال قربانیاں پوری فورس کیلئے مشعل راہ ہیں، آئی جی پنجاب
پولیس لائنز ہیڈ کوارٹرز میں آئی جی پنجاب نے راولپنڈی پولیس کے افسران سے میٹنگ کی صدارت کے دوران اہم ہدایات جاری کیں۔
رمضان المبارک کے دوران مساجد، امام بارگاہوں اور رمضان بازاروں و مارکیٹوں کی سکیورٹی پر خصوصی توجہ دی جائے۔ آئی جی پنجاب
جرائم پیشہ عناصر کے خاتمے اور منظم جرائم کی روک تھام کیلئے ٹھوس اقدامات میں تیزی لائی جائے۔ راؤ سردار علی خان
راولپنڈی شہر میں ٹریفک کے مسائل کے حل کیلئے جامع حکمت عملی کے تحت بہترین انتظامات کئے جائیں۔ آئی جی پنجاب
اسلام آباد 12 اپریل 2022 (ٹی این ایس): انسپکٹر جنرل پولیس پنجاب راؤ سردار علی خان نے کہا ہے کہ رمضان المبارک کے دوران مساجد، امام بارگاہوں اور رمضان بازاروں و مارکیٹوں کی سکیورٹی پر خصوصی توجہ دی جائے اور جرائم پیشہ عناصر کے خاتمے اور منظم جرائم کی روک تھام کیلئے ٹھوس اقدامات میں تیزی لائی جائے۔ راؤ سردار علی خان نے ہدایت کی کہ راولپنڈی شہر میں ٹریفک کے مسائل کے حل کیلئے جامع حکمت عملی کے تحت بہترین انتظامات کئے جائیں اوراہم شاہراہوں، کاروباری و عوامی مراکز کے گردونواح میں پٹرولنگ فورسز کے گشت کے اوقات کار کو مزید بڑھایا جائے۔ آئی جی پنجاب نے ہدایت کی کہ فورس کی ویلفیئر اور استعداد کار میں اضافے کیلئے ترجیحی بنیادوں پر اقدامات جاری رکھے جائیں۔ انہوں نے مزیدکہاکہ عوام کی جان و مال کے تحفظ کے عمل میں جانوں کے نذرانے پیش کرنے والے شہدائے پولیس ہمارا فخر ہیں جن کی لازوال قربانیاں پوری فورس کیلئے مشعل راہ ہیں۔ راؤ سردار علی خان نے کہاکہ ان شہداء نے اپنی جانوں کی نذرانے پیش کرکے محکمہ کی عزت و توقیر میں اضافہ کیا ہے اورپنجاب پولیس اپنے شہداء کی قربانیوں کو کبھی فراموش نہیں کرے گی اور خوشی و غمی کے ہر موقع پر انکے شانہ بشانہ کھڑی رہے گی۔ ان خیالات کا اظہار انہوں نے آج پولیس لائنز ہیڈ کوارٹرز کے دورے کے موقع پرشہدائے پولیس کے بچوں کے ہمراہ نو تعمیر شدہ یاد گار شہداء کے افتتاح اور اجلاس کی صدارت کے دوران افسران کو ہدایات دیتے ہوئے کیا۔
راولپنڈی پولیس لائنز آمد پر کانسٹیبل محمد مظہر حسین شہید اور انسپکٹر عمران عباس شہید کے بچوں نے آئی جی پنجاب کو گلدستے پیش کیے،آئی جی پنجاب راؤ سردار علی خان نے شہدائے پولیس کے بچوں سے نوتعمیر شدہ یادگار شہداء کا افتتاح کروایا اور شہداء کی فیملیزکے ہمراہ یادگارشہداء پر پھول چڑھائے اور شہداء کے درجات کی بلندی کیلئے فاتحہ خوانی کی۔اس موقع پر پولیس کے چاق و چوبنددستے نے یاد گار شہداء پر پنجاب پولیس کے بہادر سپوتوں کی لازوال قربانیوں کو سلامی پیش کی جبکہ آئی جی پنجاب نے سی پی او آفس میں شہداء کے بچوں کو اعزازی شیلڈ ز اور تحائف پیش کیے۔سی پی او راولپنڈی عمر سعید ملک نے آئی جی پنجاب کو یاد گار شہداء کی تعمیر کے متعلق بریفنگ دی۔دوران اجلاس انہوں نے آئی جی پنجاب کو پولیس لائنز ہیڈ کوارٹرز راولپنڈی میں زیر تعمیر سمارٹ سٹی، کمپلینٹ سیل اور راول لاؤنچ پر پیش رفت بارے میں بھی بریفنگ دی۔اس موقع پر آر پی او راولپنڈی اشفا ق احمد خان، سی پی او راولپنڈی عمر سعید ملک، ایس ایس پی انوسٹی گیشن غضنفر علی شاہ، ایس ایس پی آپریشنز وسیم ریاض خان اور دیگر سینئر افسران بھی موجود تھے۔
