کراچی اگست 05.(ٹی این ایس ) پاکستان پیپلز پارٹی کے شریک چیئرمین آصف علی زرداری نے عید الاضحی کے بعد ملک بھر میں انتخابی مہم چلانے کا اعلان کیاہے۔یہ اعلان انہوں نے یہ نومنتخب رکن سندھ اسمبلی سعید غنی سے ملاقات کے دوران کیا۔ آصف علی زرداری نے کہا کہ آئندہ انتخابات میں کامیابی کا حصول یقینی بنانے کیلئے ہر صوبے کا دورہ کروں گا۔ نواز شریف کی ہٹ دھرمی کے باعث ملک اور جمہوریت کو شدید نقصان پہنچا اور اگر ان کو مزید وقت ملا تو جمہوریت کا جنازہ نکال دیتے۔ انہوں نے کہا کہ میاں صاحب کو کہا کہ مستعفی ہوجائیں ورنہ دمادم مست قلندر ہوگالیکن وہ نہ مانے اور پھر عدالتی فیصلے کے بعد خود ہی دمادم مست قلندر کردیا ۔ آصف زرداری نے کہاکہ ہم نے اداروں کو آئینی طریقے سے مضبوط کیا اور جمہوریت کو تقویت بخشی لیکن افسوس کہ نواز شریف نے روایات کو پس پشت ڈال دیا اور اگر روایت برقرار رکھی جاتیں تو میاں صاحب کو یہ دن دیکھنا پڑتے اور نہ ہی ملکی حالات مزید خراب رہتے۔
