پاک فوج نے چیئرمین تحریک انصاف عمران خان کے ادارے پر الزامات کو مسترد کردیا، ترجمان پاک فوج کے مطابق عمران خان کے ادارے اور سینئر افسر پر بے بنیاد الزامات ناقابل قبول ہیں،پاک فوج ایک انتہائی پیشہ ور اور نظم و ضبط کی حامل فوج ہے، پاک فوج کا ایک مضبوط اور انتہائی موثر اندرونی احتسابی نظام ہے۔
تفصیلات کے مطابق پاک فوج کے شعبہ تعلقات عامہ انٹر سروسز پبلک ریلیشنز (آئی ایس پی آر)کی جانب سے عمران خان کے بیان پر ردعمل سامنے آیا ہے۔آئی ایس پی آر کی جانب سے جاری بیان میں کہا گیا ہے کہ چیئرمین پی ٹی آئی عمران خان کے ادارے کے خلاف بے بنیاد اور غیر ذمہ دارانہ الزامات یکسر ناقابل قبول ہیں، چیئرمین پی ٹی آئی کے بالخصوص ایک اعلی فوجی افسر کے خلاف بے بنیاد الزامات ناقابل قبول ہیں۔آئی ایس پی آر کا کہنا ہے کہ پاک فوج ایک انتہائی پیشہ ور اور نظم و ضبط کی حامل فوج ہے، پاک فوج کا ایک مضبوط اور انتہائی موثر اندرونی احتسابی نظام ہے، پاک فوج کو انتہائی پیشہ ورانہ ہونے پر خود پر فخر ہے۔
آئی ایس پی آر کا کہنا ہے کہ کسی کو بھی ادارے یا اس کے سپاہیوں کی بے عزتی کرنے کی اجازت نہیں دی جائے گی، حکومتِ پاکستان سے درخواست کی ہے کہ وہ اس معاملے کی تحقیقات کرے، حکومت بغیرکسی ثبوت ادارے کی ہتک کے ذمہ داروں کیخلاف قانونی کارروائی کرے۔
