وفاقی وزیرِداخلہ رانا ثنااللہ نے پی ٹی آئی کا سڑکیں بندکرنے کے حوالے سے ردعمل میں کہا کہ پولیس کی حفاظت اور سرکاری پروٹوکول میں پی ٹی آئی کارکنان کے سڑکیں بند کرنے سے عوام بری طرح متاثر ہو رہے ہیں،عوام کے کاروبار،خوشی غمی میں شرکت اورتعلیمی سرگرمیاں متاثر ہو رہی ہیں،مریض ہسپتالوں میں پہنچے سے قاصر ہیں،یہ صورتحال نہ صرف ناقابل برداشت ہے بلکہ لاکھوں عوام کے لئے تکلیف دہ ہے۔
وزیرداخلہ نے کہا کہ پی ٹی آئی کے مٹھی بھر کارکنان کرسیاں ڈال کر پولیس کی ایما پر گزشتہ چار روزسے عوام کو پریشان کررہے ہیں،حالیہ پریشان کن صورتحال سے عوام کے صبر کا پیمانہ اب لبریز ہو چکا ہے۔انہوں نے کہا کہ ہم کسی قسم کا سیاسی تصادم نہیں چاہتے اور نہ ہی اسکی اجازت دے سکتے ہیں۔لیکن اندیشہ ہے عوام اب عمران خان کے فسادی اور فتنہ انگیز پیروکاروں کا خود محاسبہ شروع کر دینگے۔انہوں نے کہا کہ میری مسلم لیگ ن کے مقامی رہنماوں اور اراکین اسمبلی سے اپیل بھی ہے کہ وہ عوام کو ان مشکلات سے نکالنے میں اپنا کردار ادا کریں۔
