صدر مملکت ڈاکٹر عارف علوی سے وفاقی وزیر خزانہ اسحاق ڈار کی ملاقات، وزیراعظم شہباز شریف کا پیغام صدر مملکت تک پہنچایا۔
ایوان صدر اسلام آباد میں وفاقی وزیر خزانہ اسحاق ڈار اور صدر مملکت عارف علوی کے درمیان ہونے والی ملاقات 20 منٹ تک جاری رہی۔
دونوں اہم شخصیات کے درمیان ہونے والی ملاقات میں پی ٹی آئی کے جلد انتخابات کے مطالبے اور حکومتی اتحادیوں کے نکتہ نظر پر گفتگو کی گئی۔
ملاقات میں صدر مملکت ڈاکٹر عارف علوی نے قبل از وقت انتخابات کے حوالے سے عمران خان کا موقف سامنے رکھا، اس موقع پر پاکستان متحدہ موومنٹ )پی ڈی ایم ( اور پاکستان تحریک انصاف کے متوقع مذاکرات پر بھی بات چیت کی گئی۔
ذرائع کے مطابق عمران خان کی ہدایت پر صدر عارف علوی پھر متحرک ہوگئے ،
ذرائع کے مطابق حکومت نے قبل از وقت انتخابات پر بات کرنے کے لیے تحریک انصاف کو پارلیمنٹ میں واپسی کی تجویز دی،
عارف علوی نے بھی تحریک انصاف کو پارلیمنٹ واپس آنے کی تجویز دے دی۔
صدر مملکت نے موقف اپنایا کہ نگران حکومت کے قیام اور انتخابی اصلاحات کیلیے تحریک انصاف کو پارلیمنٹ میں آنا ہوگا، عمران خان نے ابھی تک اس تجویز کا کوئی جواب نہیں دیا،
سابق وزیر اعظم صدر علوی پر زور دے رہے ہیں کہ وہ حکومت سے الیکشن کی تاریخ لیں، اس بار بات چیت بغیر کسی تیسرے فریق کے ہورہی ہے،
اسحاق ڈار نے صدر عارف علوی سے ہونے والی تین ملاقاتوں اور رابطوں بارے نواز شریف کو بھی آگاہ کردیا۔
واضح رہے کہ صدر مملکت عارف علوی سے اسحاق ڈار کی دو ملاقاتیں پہلے بھی ہوچکی ہیں۔
