آئون گواهي ڏيان ٿو ته وزيراعظم شهباز شريف جهڙو ڪم اڳ ۾ ڪنهن کي ڪندي ناهي ڏٺو: پرڏيهي وزير بلاول ڀٽو زرداري

 
0
89

پرڏيهي وزير بلاول ڀٽو زرداري وزيراعظم محمد شهباز شريف ۽ ناڻي واري وزير اسحاق ڊار جا ٻوڏ سٽيلن جي تعمير ۽ ترقي جي منصوبن جي لاءِ بجيٽ ۾ فنڊ رکڻ تي ٿورا مڃيندي چيو آهي ته آئون گواهي ڏيان ٿو ته وزيراعظم شهباز شريف جنهن جذبي سان ڪم ڪري ٿو ان جهڙو ڪم ڪندي ڪنهن کي ناهي ڏٺو، جيڪي ماڻهو جمهوريت، آئين، پارليامينٽ ۽ انساني حقن تي يقين نه رکندا هئا، 9 مئي جي حملن کانپوءِ هاڻي اهي ئي انهن اصولن تحت احتساب بدران مفاهمت جي ڳالهه ڪري رهيا آهن، پيپلزپارٽي دفاعي ٺڪاڻن، شهيدن جي يادگارن ۽ حساس جاين تي حملي آور ٿيندڙن جي دفاع لاءِ ڪڏهن به اڳتي نه ايندي، ملڪ ۾ سياسي استحڪام آڻڻ جي لاءِ ميثاق جمهوريت تي ڪاربند رهندي اڳتي ايندڙ حڪومت ۽ مخالف ڌر کي ذميواراڻو ڪردار ادا ڪرڻو پوندو، انهي صورت ۾ اسان دنيا ۾ عالمي حصيدارن سان گڏجي دهشتگردي جو مقابلو ڪري سگهنداسين. قومي اسيمبلي کي خطاب ڪندي پرڏيهي وزير بلاول ڀٽو زرداري وزيراعظم شهباز شريف ۽ ناڻي واري وزير اسحاق ڊار جا ٻوڏ سٽيلن جي منصوبن جي حوالي سان ٿورا مڃيا ۽ چيو ته وزيراعظم جا اهي پنهنجا ئي واعدا هئا جيڪي پورا ٿيندي نظر اچي رهيا آهن. هن چيو ته وڏن جو احترام اسان جي ثقافت آهي، مون کي به منهنجي والده سدائين وڏن جي احترام جي تلقين ڪئي، اسان جي ڪردارڪشيءَ ۽ گارگند واري سياست نه آهي، اسان مثبت ۽ ملڪ کي مسئلن مان ڪڍڻ واري سياست تي يقين رکون ٿا، مسئلن جي صحيح نشاندهي تمام ضروري آهي، ناڻي وارو وزير اسحاق ڊار منهنجو انڪل آهي، ان جو ميثاق جمهوريت جي حوالي سان وڏو اهم ڪردار آهي، سڀ کان پهرين هن 2006ع ۾ محترمه بينظير ڀٽو سان ملاقات ڪئي هئي، منهنجو ان سان ٻاروتڻ کان تعلق آهي. هن چيو ته منهنجو والد ته اڳ ئي يارن جو يار مشهور آهي، شهباز شريف رڳو مسلم ليگ (ن) جو ئي وزيراعظم نه آهي، هو وڌيڪ وزيراعظم پيپلزپارٽي جو آهي. هن چيو ته وزيراعظم شهباز شريف جنهن جذبي سان ڪم ڪري ٿو آئون گواهي ڏيان ٿو ته ان جهڙو ڪم ڪندي ڪنهن کي ناهي ڏٺو، وزيراعظم ملڪ کي مسئلن مان ڪڍڻ جي لاءِ ڏينهن رات ڪم ڪري رهيو آهي، اسان کي ان جا هٿ مضبوط ڪرڻ گهرجن. ٻوڏ سٽيلن جي لاءِ نئين سر تعمير جي لاءِ رقم بجيٽ ۾ رکي وئي آهي، وزيراعظم سمورن ٻوڏ سٽيل علائقن جو دورو ڪيو ۽ پاڻ تباهي ڏٺي ۽ ماڻهن سان واعدا ڪيا، گڏيل قومن جي سيڪريٽري جنرل پنهنجي مصروفيتن کي ڇڏي پاڪستان آيو ۽ ٻوڏ سٽيل علائقن جو پاڻ دورو ڪيو. هن گڏيل قومن جي سيڪريٽري جنرل سان گڏجي پوري دنيا جو ڌيان ٻوڏ جي تباهين طرف ڇڪرايو، اسان دنيا جي وڏن ملڪن ۽ گڏيل قومن سان گڏجي جنيوا ۾ ڪانفرنس منعقد ڪرائي جنهن ۾ عالمي مالياتي ادارن ۽ مختلف ملڪن پاران 9 ارب ڊالر جي فنڊز جي اعلانن جي ڪاميابي حاصل ڪئي، جڏهن اسان واپس آياسين ته وزيراعظم ان ڪاميابي تي گڏيل پريس ڪانفرنس ڪئي. هن چيو ته موسمياتي تبديلين جي ڪري پورو ملڪ متاثر ٿيو آهي، اسان کي هر قسم جي انفراسٽرڪچر ۾ تبديلي آڻڻ جي لاءِ تمام گهڻا وسيلا گهربل هوندا، ماحول دوست توانائي (گرين انرجي) تي ڌيان ڏيڻو پوندو، انهن اسڪيمن جي فنڊنگ حاصل ڪرڻ جي لاءِ اسان کي ڪوششون ڪرڻيون پونديون، گڏيل قومون هجي يا ڪوپ – 29 هجي اسان کي انهن فورمن تي به موسمياتي تبديلين جي حوالي سان پنهنجي سنجيدگي ڏيکارڻي پوندي. هن چيو ته اسان کي مستقبل جي منصوبابندي ۾ به گرين انرجي، گرين ايڪلچر ۽ موسمياتي تبديلين کي منهن ڏيڻ تي ڌيان ڏيڻو پوندو. هن چيو ته اسان کي سڀ کان اڳ عوام سان سچ ڳالهائڻو پوندو، اڳوڻي وزيراعظم 100 سيڪڙو ڪوڙ لاڳيتو ڳالهائڻ جي روش جاري رکي ته جيئن ان جو 50 سيڪڙو ڪوڙ ماڻهو سچ تسليم ڪن. هن چيو ته ڪوڙ تي ٻڌل مقبول سياست مان اسان کي ڇوٽڪارو حاصل ڪرڻو پوندو، آمريڪا ۾ به مقبول سياستدان جي خلاف ايڪشن شروع ٿيو، هن قانون جي حڪمراني جي ذريعي رياست جي عملداري قائم ڪئي، اڳوڻي آمريڪي صدر جا سمورا سوشل ميڊيا اڪائونٽس بند ڪيا ويا، اڳوڻي صدر ڪانگريس تي حملو ڪيو، اسان وٽ مقبول سياستدان به اهڙي قسم جي حڪمت عملي جوڙي، اسان جو آئين ٽوڙيو ويو، بي اعتمادي جي رٿ ناڪام بڻائڻ جي ڪوشش ڪئي وئي، 25 مئي تي اسلام آباد کي ساڙيو ويو، اها به آءِ ايم ايف پروگرام جي خلاف سازش هئي، ان وقت ناڻي وارو وزير ۽ خيبرپختونخواهه جو صوبائي ناڻي وارو وزير سازش ۾ شريڪ هئا. بلاول ڀٽو زرداري طنز ڪيو ته اسان ته آمريڪا کان وڌيڪ وڏا جمهوري ماڻهو جن ان جي خلاف ڪا ڪارروائي نه ڪئي، 9 مئي تي هن جناح هائوس تي حملي، دفاعي ٺڪاڻن، شهيدن جي يادگارن ۽ جي ايڇ ڪيو تي حملا ڪيا، ڇا آمريڪا ۾ اهي حملا ٿين ته جمهوريت جي نالي تي ان کي ڇڏيو ويندو. هن چيو ته اها سياست نه دهشتگردي هئي، مس انفارميشن ۽ ڊس انفارميشن جي ذريعي ملڪ سان اها راند کيڏي وئي، ڪالهه تائين جيڪي جمهوريت، آئين ۽ انساني حقن کي تسليم ئي نه ڪندا هئا، اڄ اهي آئين، انساني حقن، پارليامينٽ ۽ جمهوريت جون ڳالهيون ڪري هيا آهن، هاڻي اهي 9 مئي جي واقعن تي احتساب بدران مفاهمت جون ڳالهيون ڪري رهيا آهن. هن چيو ته اسان جي دل ۾ انهن جي لاءِ ڪا نرمي پيدا نه ٿيندي. بلاول ڀٽو زرداري چيو ته جيڪڏهن دفاعي ٺڪاڻن، شهيدن جي يادگارن ۽ حساس جاين تي حملي آور ٿيندا ته پيپلزپارٽي انهن جو دفاع ڪرڻ جي لاءِ اڳتي نه ايندي. هن چيو ته غيرجمهوري سياستدانن کي رڳو تڏهن انهن کي جمهوريت جي ياد اچي ٿي جڏهن جناح هائوس تي حملا ٿين ٿا، ملڪ ۾ قانون جي حڪمراني ۽ رياست جي عملداري قائم ٿيڻ گهرجي، جيڪڏهن اهو نه ڪيو ويو ته سياسي استحڪام نه ايندو. هن چيو ته غيرذميواراڻي مخالف ڌر ملڪ جي لاءِ نقصان جو سبب هوندي آهي. هن چيو ته پي ٽي آءِ جي چيئرمين پنهنجي پارٽي کي بند گهڙيءَ ۾ ڌڪي ڇڏيو آهي، ڪٿي ائين نه ٿئي جو پورو جمهوري نظام ئي بند گهٽيءَ ۾ نه هليو وڃي. ميثاق جمهوريت سياسي استحڪام آڻڻ جو روڊ ميپ آهي، اسان کي ملڪ ۾ معيشت جي لاءِ به هڪ حڪمت عملي جوڙڻي پوندي. هن چيو ته ملڪ ۾ سياسي استحڪام آڻڻ جي لاءِ ايندڙ حڪومت ۽ اپوزيشن کي ذميواراڻو ڪردار ادا ڪرڻو پوندو. هن چيو ته پيپلزپارٽي اتحادين سان پاليسي معاملن تي اختلاف راءِ ڪري سگهي ٿي پر 2006ع ۾ ميثاق جمهوريت تي هر صورت ۾ عمل ڪرڻو پوندو. ڀارت ۽ آمريڪا جو هڪ گڏيل بيان آيو آهي، ان جو پرڏيهي آفيس جائزو وٺندي. هن چيو ته ملڪ ۾ سڀ کان اڳ اسان کي سياسي استحڪام آڻڻو پوندو، ان کانپوءِ آمريڪا سميت ٻين ملڪن سان ٻطرفن لاڳاپن ۽ حصيداري جي حوالي سان معاملا اڳتي وڌائي سگهنداسين. هن چيو ته پاڪستان دنيا ۾ دهشتگردي کان سڀ کان وڌيڪ متاثر ٿيندڙ ملڪ آهي، اسان چاهيون ٿا ته اسان ملڪ ۾ امن قائم ڪرڻ جي لاءِ ڪم ڪريون، آمريڪا افغانستان مان هليوويو آهي، هاڻي ان جي آڏو يوڪرين جي جنگ آهي، آمريڪا ۽ يورپي ملڪن جو دهشتگردي طرف ڌيان ناهي رهيو، دهشتگردي جو مقابلو اسان ان صورت ۾ ڪري سگهنداسين جڏهن اسان عالمي حصيدارن کي گڏائي ڪنداسين