لاہور ہائیکورٹ نے سابق وزیر اعلیٰ اور پی ٹی آئی صدر چودھری پرویز الٰہی کی نظر بندی کیخلاف درخواست پر ایڈیشنل چیف سیکرٹری ہوم کو پیر تک فیصلہ کرنے کا حکم دے دیا۔
تفصیلات کے مطابق لاہور ہائیکورٹ کے جسٹس راحیل کامران شیخ نے پرویز الٰہی کی اہلیہ قیصرہ الہیٰ کی درخواست پر سماعت کی۔ قیصرہ الہیٰ کے وکیل عامر سعید راں نے دلائل دیے۔
درخواست میں پرویز الٰہی کی ایڈیالہ جیل منتقلی کو بھی چیلنج کیا گیا۔
درخواست میں مؤقف اپنایا گیا کہ سابق وزیراعلیٰ کی تمام کیسز میں عدالت سے ضمانت منظور ہوچکی ہے، انھیں رہا کرنے کی بجائے نظر بندی کا حکمنامہ جاری کیا گیا۔
وکیل کے دلائل سننے کے بعد عدالت عالیہ نے ایڈیشنل چیف سیکرٹری ہوم غلام سرور کو نظربندی کیخلاف درخواست پر فیصلہ کرنے کا حکم دیا۔
عدالت نے کہا کہ ایڈیشنل چیف سیکرٹری ہوم سوموار کو قیصرہ الہیٰ کی درخواست پر فیصلہ کرے۔
عدالت نے حکم دیا کہ ایڈیشنل چیف سیکرٹری ہوم 8 اگست کو عملدرآمد رپورٹ پیش کریں
